QR Prezidenti Baspasóz qyzmetiniń Sektor meńgerýshisi Qanat Ysqaqov Aqparat jáne qoǵamdyq damý ministriniń buiryǵymen Aqparat komitetiniń tóraǵasy bolyp taǵaiyndaldy, dep habarlaidy "Ult aqparat" Memleket basshysynyń Baspasóz hatshysy Berik Ýálige silteme jasap.
«Qanat Ysqaqov ál-Farabi atyndaǵy Qazaq ulttyq ýniversitetin, Prezidenttiń «Bolashaq» baǵdarlamasy boiynsha M.V.Lomonosov atyndaǵy Máskeý memlekettik ýniversitetin támámdaǵan. Ol eńbek jolyn 2004 jyly Almaty qalalyq Jastar saiasatyn damytý memlekettik qorynyń aqparattyq-saraptamalyq bóliminiń jetekshi mamany retinde bastaǵan» delingen jazbada.
Sondai-aq Berik Ýáli Qanat Ysqaqovtyń ár jyldary QR Mádeniet jáne aqparat ministrliginiń Qoǵamdyq-saiasi jumys departamentinde bas maman, QR Parlament Májilisiniń komitet tóraǵasynyń kómekshisi, QR Memlekettik hatshysy Hatshylyǵynda konsýltant, QR Prezidenti Ákimshiliginiń Strategiialyq ázirlemeler jáne taldaý ortalyǵynda konsýltant qyzmetterin atqaryp, memlekettik qyzmettiń san salasynan ótip, shyńdalǵan maman ekenin atap ótti.
«2012 jyldan bastap QR Prezidentiniń Baspasóz qyzmetinde eńbek etedi. Qanatty áriptesteri uiymdastyrýshylyq qabileti zor, óz jumysyn jetik biletin, jan-jaqty maman retinde tanidy, qurmetteidi. Onyń bul qasietteri elimizdiń aqparattyq keńistigin damytý isinde óz paidasyn tigizedi degen senimdemin. Qanatqa jańa qyzmetinde tabys tileimin!» dep jazdy Berik Ýáli.
