Prezident Ramazan aiynda arnaiy dastarqan jaiyp, aýyzashar berdi, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaev jinalǵan qaýym aldynda sóilegen sózinde bul igi dástúrdiń halyqty bereke-birlikke shaqyratynyn atap ótti. Memleket basshysy ádiletti qoǵam qurýdyń mańyzdylyǵyna toqtaldy.
– Jaqyn arada Konstitýtsiiamyzdy ózgertetin boldyq. Biraq, eń aldymen, jurtymyzdyń sana-sezimi jańǵyrýy qajet. Bul – ońai sharýa emes. Aldymyzda kóptegen túitkilder bar, sondyqtan bárimiz jumyla eńbek etýimiz kerek. Eń bastysy, nietimiz taza, peiilimiz túzý bolýǵa tiis. Bir-birimizge janashyrlyq tanytýymyz kerek. Qazir búkil adamzatqa dál osyndai qasietter jetispei jatyr, – dedi Prezident.
Qasym-Jomart Toqaev jastarǵa durys baǵyt-baǵdar berilýi kerek ekenin, bilimdi, kózi ashyq, kókiregi oiaý, otanshyl jastar ǵana keleshektiń iesi bolatynyn erekshe atap ótti. Prezidenttiń pikirinshe, jastarymyzdyń ulttyq qundylyqtardy boiyna sińirip, qazirgi zamannyń ǵylym-bilimin igerýi airyqsha mańyzdy.
Memleket basshysy islam dininiń órkeniet qundylyqtaryn, beibitshilik uǵymdaryn nasihattaitynyn atap ótti.
– Jurtymyz qashanda beibit ómirdi baǵalai bilgen. Biz osy ustanymnan ainymaimyz. Ol úshin elimizge bereke-birlik, ózara túsinistik qajet. Islam adamdardy bólinýge emes, birlikke shaqyrady. Imandylyq – eń asyl qasiet. Sondyqtan, dástúrli dinimiz urpaq tárbiesiniń ózegi bolýy kerek. Urpaqqa osyndai ónegeli tárbie berý – bárimizdiń ortaq mindetimiz, – dedi Qasym-Jomart Toqaev.
Prezident elimizge tatýlyq pen tynyshtyq tiledi.
