Memleket basshysynyń qatysýymen ótetin syrtqy saiasi oqiǵalarǵa qatysty kóptegen saýaldardyń kelip túsýine bailanysty Prezidenttiń Baspasóz hatshysy Aidos Úkibai Nursultan Nazarbaevtyń aldaǵy jumys kestesi týraly aitty. Bul týraly Aqordanyń Feisbýktegi resmi paraqshasynda habarlandy.
Málimetke sai, Memleket basshysy biylǵy 13 naýryzda Koreia Respýblikasy Ulttyq Assambleiasynyń Spikeri Chon Se Giýnmen kezdesedi.
Al, 14 naýryzda Nursultan Nazarbaevtyń shaqyrýymen Tájikstan Respýblikasynyń Prezidenti Emomali Rahmon Qazaqstanǵa resmi saparmen keledi. Sapar aiasynda memleketter basshylary kún tártibindegi ekijaqty, óńirlik jáne halyqaralyq ózekti máselelerdi talqylaidy.
15 naýryzda Qazaqstan Prezidenti Ortalyq Aziia elderi, sonyń ishinde Qazaqstan Respýblikasy, Qyrǵyz Respýblikasy, Tájikstan Respýblikasy, Túrikmenstan jáne Ózbekstan Respýblikasy basshylarynyń jumys (konsýltativtik) kezdesýine qatysady. Bul bes jaqty kelissózderdiń Ortalyq Aziianyń barlyq eli úshin ortaq mereke - Naýryz meiramy qarsańynda ótýiniń mańyzy zor.
Túrikmenstanda joǵary deńgeidegi is-sharalardyń aldyn ala josparlanýyna bailanysty bul elden Medjlis tóraiymy A.T.Nýrberdyeva hanym qatysady.
Sol kúni N.Nazarbaev pen Sh.Mirziioevtiń qatysýymen Qazaqstandaǵy Ózbekstan jylynyń saltanatty ashylý rásimi ótedi. Sondai-aq, eki el kóshbasshylary óner qairatkerleriniń gala-kontsertine qatysady.
Sondai-aq, 16 naýryzda Memleket basshysy Siriia jónindegi Astana protsesine kepil bolatyn ministrlik deńgeiindegi birinshi kezdesýge qatysýshylar - Resei, Túrkiia jáne Iran syrtqy ister ministrlerimen júzdesedi.
