foto: Polisia.kz
Aqmolalyq zeinetker sheteldik “neirohirýrgke” senip, 5 mln teńgesinen aiyryldy, – dep habarlaidy Polisia.kz.
Ózin Siriialyq neirohirýrg dep tanystyrǵan alaiaqpen hat almasqan aqmolalyq 5 mln teńgesinen aiyryldy. Zeinetkerdiń aqshasyn jalǵan BUU ókilderi "áskeri dárigerdiń Qazaqstanǵa ushýyn uiymdastyrý qajet" dep aldap ielengen.
Shýchinsk qalasynyń 71 jastaǵy turǵyny erekshe alaiaqtyqqa tap boldy. 5 aqpan kúni zeinetker jergilikti politsiia bólimine habarlasyp, sheteldikpen hat almasqannan keiin 4,9 mln teńgesinen aiyrylǵanyn aitty. Alty aiǵa jýyq ýaqyt boiy alaiaqtar sheteldiktiń Qazaqstanǵa kedergisiz ushyp kelýi úshin jábirlenýshiden ártúrli sebeptermen AQSh dollary túrinde qarajat surap otyrǵan.
Politseiler alaiaqtyq faktisin QR QK-niń 190-baby 3-bóligi (Alaiaqtyq) boiynsha sotqa deiingi tergep-tekserýdiń biryńǵai tiziminde tirkedi.
Jábirlenýshi 2022 jyldyń shildesinde Instagram áleýmettik jelisi arqyly ózin Ýiliam Albert dep tanystyrǵan adammen tanysqanyn aitty. Jańa dosy aqmolalyqqa neirohirýrg dárigeri bolyp jumys isteitinin jáne Siriiada Aleppo qalasynyń mańynda ekenin aitqan. Budan ári bailanys Skype arqyly jalǵasyp, biraz ýaqyttan keiin sheteldik Qazaqstanǵa kelgisi keletinin habarlaǵan. Alaida ol úshin zardap shegýshiniń jazbasha kelisimi qajet bolǵandyqtan, áiel ony Skype arqyly jibergen.
Shamamen eki kúnnen keiin ótinish berýshiniń elektrondy mekenjaiyna Birikken Ulttar uiymynan hat kelgen. Onda BUU-nyń jalǵan ókilderi “Alberttiń” qaýipsiz ushyp kelýi úshin 2 myń AQSh dollary kóleminde aqsha qajet ekenin habarlaǵan. Zeinetker kórsetilgen shot boiynsha talap etiletin somany jibergennen keiin, oǵan sol “BUU ókilderi” habarlasyp aqshalai qarajattyń durys engizilmegenin jáne Qazaqstanǵa ushatyn ushaq toqtatylǵanyn aityp túsindirgen. Alaiaqtar jarty jyl boiy reistiń toqtatylýynyń ártúrli sebepterin oilap taýyp, al áiel bolsa, qajetti aqsha aýdarymdaryn jibere bergen, týystarynyń eshqaisysyna jańa dosy týraly tis jarmaǵan. Jalpy, óńir turǵyny alaiaqtardyń shotyna 10 myńǵa jýyq AQSh dollaryn nemese 4,9 mln teńge jibergen. Ol bul aqshany týystarynan qaryzǵa alǵan, sonymen qatar bankterden eki nesie alǵan.
Qazirgi ýaqytta tergeý sharalary júrgizilip jatyr. Aqsha aýdarymdarynyń túbirtekteri men hat-habarlar tárkilendi.
