Aqmolalyq áiel alaiaqqa 3 mln teńgege jýyq nesie rásimdep bergen, dep habarlaidy QazAqparat.
Aqmola oblystyq Politsiia departamenti baspasóz qyzmetiniń málimetinshe, alaiaqtyń arbaýyna túsip qalǵan Zerendi aýdany Chaglinka aýylynyń 48 jastaǵy turǵyny. Ol ózine politsiia qyzmetkeri retinde habarlasqan alaiaqqa Kókshetaý qalasyndaǵy eki bankten 800 000 jáne 2 million teńgege nesie alyp bergen.
«11 sáýirde áieldiń uialy telefonyna belgisiz abonentten qońyraý túsken. Telefon shalǵan adam ózin Nur-Sultan qalasynyń politsiia qyzmetkeri retinde tanystyrǵan. Ol áielge alaiaqtardyń qurbany bolýy múmkin ekenin jáne buǵan jol bermeý úshin politsiiamen birge jumys isteý qajettigin aitqan», - dedi vedomstvodan.
Budan ári jańa bólimniń jalǵan qyzmetkeri áieldiń atyna nesie zańsyz rásimdelýi múmkin ekenin aitty jáne oǵan jaqyn arada barlyq jaǵdailardy naqtylaý úshin bankke barýǵa keńes beredi.
«Osylaisha, alaiaqtardyń arbaýyna túsken áiel kelesi kúni «politsiianyń» arnaiy operatsiiasyna qatysatynyna senip, bankten 800 000 teńge nesie rásimdeidi. Keiin ekinshi bankke baryp, taǵy 2 million nesie alyp, aqshany qaitarý úshin «politsiianyń» esep-shotyna aýdarady. Sáýirdiń 14 kúni ǵana ol ýchaskelik politsiia qyzmetkerimen kezdeskeninde ǵana alaiaqtyń aldaýyna túskenin biledi», - dep tolyqtyrdy vedomstvodan.
Qazirgi kezde osyǵan bailanysty Qylmystyq kodekstiń 190-baby 2-bóligi boiynsha sotqa deiingi tergeý sharalary júrgizilýde.
