Táýelsizdiktiń 30 jyldyǵyna orai Aqmola oblysynda 16 jáne 17 jeltoqsan kúnderi dúniege kelgen 50 sábidiń ata-anasyna Memleket basshysynyń quttyqtaý tilegi jazylǵan baby-bokstar syiǵa tartyldy, dep habarlaidy QazAqparat.
«Súiinshi» syiqorabyna Qazaqstan Respýblikasynyń Prezidenti Qasym-Jomart Toqaevtyń quttyqtaý tilegi jazylǵan ashyq hat, «Táýelsiz Qazaqstanǵa 30 jyl» monetasy jáne balanyń týý týraly kýáligi salynǵan.
«Ainalaiyn, bóbek! Seniń týǵan kúniń elimizdiń eń basty merekesimen tuspa-tus keldi. Óziń dúnie esigin ashqan kezde halqymyz qasterli Táýelsizdiginiń 30 jyldyǵyn atap ótip jatty. Saǵan baqytty ári uzaq ǵumyr tileimin!», - dep jazylǵan Memleket basshysynyń quttyqtaý hatynda.
16 jáne 17 jeltoqsanda týǵan balalarǵa týý týraly kýálikti alý týraly ótinimderdi «Azamattarǵa arnalǵan úkimet» memlekettik korporatsiiasynyń qyzmetkerleri qabyldap, ári qarai Qazaqstan azamatynyń alǵashqy qujatyn resimdeý úshin AHAJ organdaryna joldandy.
«Súiinshi» syiqorabyna ie bolǵandardyń arasynda kókshetaýlyq Áigerim Ysqaqova da bar. Ol jeltoqsannyń 16-da qyz balany dúniege ákelgen. Náresteniń salmaǵy 3 keli 788 gramm, boiy 53 santimetr. Ata-anasy onyń esimin Aziza qoiǵan. Sábidiń ata-anasy qýanyshtaryna ortaqtasyp, syi-qurmet kórsetkenderge sheksiz alǵysyn bildirýde.
Jalpy, Aqmola oblysynda 16 jáne 17 jeltoqsan kúnderi dúniege kelgen 50 sábidiń ata-anasyna Memleket basshysynyń quttyqtaý tilegi jazylǵan baby-bokstar syiǵa tartyldy. Onyń 22-i Kókshetaý qalasynda tirkelgen.
Aita ketý kerek, «Súiinshi» syiqoraptaryn QR Tsifrlyq damý, innovatsiialar jáne aeroǵarysh ministrligi «Azamattarǵa arnalǵan úkimetpen birge jáne QR Ulttyq bank, Tsentrkredit banki jáne «Qazposhta» AQ qatysýymen uiymdastyryp otyr.
