Aqmola oblysyndaǵy ushaq apatyna qatysty qylmystyq is qozǵaldy. Bul týraly "Ult aqparat" QR Bas kólik prokýratýrasyna silteme jasap habarlaidy.
«Aqmola oblysy aýmaǵynda áýe-himiialyq jumystar júrgizý kezinde AN-2 ushaǵynyń apatqa ushyraýyna bailanysty QR Qylmystyq kodeksiniń 344-baby boiynsha («Temirjol, áýe jáne sý kólikterin paidalaný erejeleriniń saqtalmaýy») qylmystyq is qozǵaldy», - delingen kólik prokýratýrasynyń málimetinde.
Vedomstvonyń habarlaýynsha, kóliktegi politsiia departamentiniń qyzmetkerlerinen jedel tekserý toby qurylǵan.
«Áýe apatyn tekserý barysy Bas kólik prokýratýrasynyń baqylaýynda», - delingen resmi aqparatta.
Eske sala keteiik, búgin Aqmola oblysynda AN-2 ushaǵy apatqa ushyrady. Saldarynan ushqysh kóz jumyp, eki ekipaj múshesi túrli jaraqatpen aýrhanaǵa jetkizildi. Dárigerlerdiń aitýynsha, ekipaj músheleriniń jaǵdaiy óte aýyr.
