Foto: Videodan alynǵan kadr
Tselinograd aýdanynyń Jańaesil aýylynda jalpy bilim beretin mektep direktorynyń tárbie isi jónindegi orynbasary temeki shekken oqýshymen dórekki sóilesti, sol úshin ony pedagogikalyq ádep jónindegi keńes jumysynan shyǵardy, dep habarlaidy Kazinform agenttigi.
Muǵalimniń mektep oqýshysyna qatysty dóreki qylyǵy týraly beinejazba áleýmettik jelide jariialandy. Jeli qoldanýshylary muǵalimniń áreketin synǵa aldy.
Aqmola oblystyq bilim basqarmasy baspasóz qyzmetiniń málimetinshe, osy derek boiynsha qyzmettik tergeý júrgizilgen. Belgili bolǵandai, ekinshi sabaqtan keiingi úzilis kezinde 7,9,10 synyp oqýshylary sportzalǵa voleibol oinaýǵa barǵan. Alaida, dene shynyqtyrý pániniń muǵalimi A.Iýtina oqýshylardyń voleibol oinaǵanyn emes, 7-synyp oqýshysy D.Kimniń temeki shegip turǵanyn kórgen. Osy kezde muǵalim birden mektep direktorynyń tárbie jónindegi orynbasary B.Mekebaidy shaqyrǵan, ol oqýshymen áńgimelesken.
Áńgime barysynda oqýshy sportzalda temeki shegetinin moiyndaǵan. Oqýshynyń bul jaýaby mektep direktory orynbasarynyń ashýyna tiip, ol emotsiiaǵa erik bergen.
«Bilim bóliminiń jumys toby Jańaesil aýylyndaǵy balalarmen, ata-analarmen jáne mekteptiń pedagogikalyq ujymymen áńgimelesti. Osy derek boiynsha júrgizilgen talqylaýdan keiin kámeletke tolmaǵan balanyń zańdy ókili D.Kimnen pedagog B.Mekebaiǵa shaǵymdan bas tartý týraly ótinish kelip tústi. Degenmen, bul jaǵdai Jańaesil aýyly mektebiniń pedagogikalyq ádep jónindegi keńesiniń otyrysynda qaraldy, onda QR Eńbek kodeksiniń 52-babynyń 14-tarmaǵyna sáikes B.Mekebaidy jumystan shyǵarý týraly sheshim qabyldandy», - dedi vedomstvodan.
Aqmola oblysy PD baspasóz qyzmeti áleýmettik jelide jeldei esken beinejazbany politsiia zerttegenin atap ótti.
«Keleńsiz jaǵdai shynymen Jańaesil aýylyndaǵy orta mektepte bolǵany rastaldy. Muǵalimniń zańsyz áreketteri deregi boiynsha material Tselinograd aýdandyq politsiia bóliminiń aqparatty esepke alý kitabynda tirkeldi. Tekseris júrgizilýde, sonyń qorytyndysy boiynsha naqty sheshim qabyldanady, - dep túsindirdi Kazinform tilshisiniń saýalyna jaýap bergen PD baspasóz qyzmeti.
