Aqmola oblystyq taýarlar men qyzmetterdiń sapasy men qaýipsizdigin baqylaý departamentiniń basshysy Ainagúl Mýsina koronavirýs infektsiiasyn juqtyrǵan turǵyndar týraly málimet berdi, dep habarlaidy QazAqparat.
1 sáýirdegi jaǵdai boiynsha Aqmola oblysynda virýs juqtyrǵan naýqastar sany 16-ǵa jetti.
Sońǵy anyqtalǵan 5 naýqastyń tórteýi buryn koronavirýs juqtyrǵan naýqastarmen bailanysta bolǵan, 1 adam Kókshetaý qalasynan tabyldy.
Eki naýqas 1984 jyly týǵan áiel men 2017 jylǵy sábi - Qoiandy aýylynyń turǵyndary. Olar 1979 jyly týǵan Qoiandy aýylynyń turǵynynan virýs juqtyrǵan. Er adam elordada koronavirýs infektsiiasy zerthanalyq túrde rastalǵan adammen jumys babymen bailanysta bolǵan.
1962 jyly týǵan áiel men 2011 jylǵy jasóspirim Qosshy aýylynda turady. Olar Nur-Sultan qalasynan kelgen týys áielmen kezdesken. Bul áielden 26 naýryzda koronavirýs infektsiiasy tabyldy. Al 28 naýryzda osy oqiǵa boiynsha 3 adam aýrýhanaǵa jatqyzyldy.
Kópbeiindi oblystyq aýrýhana janyndaǵy emhananyń sanitarlyq qyzmetkeri - 1962 jyly týǵan Kókshetaý turǵyny jumys barysynda dene qyzýymen jáne JRVI belgilerimen terapevtke qaralǵan. Áielge sol sátte COVID-19 testi júrgizildi jáne infektsiianyń bary rastaldy. Onymen bailanysta bolǵan tulǵalar anyqtalyp jatyr. Ázirge 35 meditsinalyq qyzmetker, 4 otbasy múshesi karantindik statsionarǵa jatqyzyldy. Kópbeiindi oblystyq aýrýhanada karantin jariialanyp, epidemiialyq tekserý júrip jatyr.
Patsientter búgin Aqmola oblystyq týberkýlezge qarsy dispanseriniń infektsiia bólimine jatqyzyldy. Jaǵdailary qanaǵattanarlyq.
Qazirgi ýaqytta oblysta 174 patsient aýrýhanada jatyr. 13 adam - Aqmola oblystyq týberkýlezge qarsy dispanserinde, 2 adam - Nur-Sultan qalalyq ftiziopýlmonologiia ortalyǵynda, 94 patsient - provizorlyq orynda, 65 adam - karantindik statsionarda jatyr. Odan bólek, 362 adam úi karantinine oqshaýlanǵan.
