Aqmola oblysy aýmaǵynda «Ekaterinbor-Almaty» tas jolynda bolǵan jol apatynan 10 adam zardap shekti, dep habarlaidy QazAqparat.
Oblystyq politsiia departamenti baspasóz qyzmetiniń málimetinshe, jol apaty 6 jeltoqsanda saǵat 17:05-te Arshaly aýdany Shóptikól stansasynyń janynda «Ekaterinbor-Almaty» avtojolynyń 1 318-shi shaqyrymynda oryn alǵan.
«Qaraǵandynyń 40 jastaǵy turǵyny basqarǵan Toyota Highlander avtokóligi jol jieginde turǵan Kia Rio kóligin soqty. Jeńil kóliktiń júrgizýshisi Nur-sultan qalasynyń 44 jastaǵy turǵyny. Soqydan jeńil kólik ornynan syrǵyp, jol jieginde turǵan Toyota RAV4 kóligine soqtyldy», - dep túsindirdi vedomstvodan.
Oblystyq densaýlyq saqtaý basqarmasynyń basshysy Nariman Syzdyqovtyń aitýynsha, JKO saldarynan barlyǵy 10 adam zardap shekti, onyń ishinde eki bala bar.
«Balalar statsionarda jatyr, olardyń jaǵdaiy birqalypty. Zardap shekken 19 jastaǵy qyzdyń jaǵdaiy óte aýyr», - dedi N.Syzdyqov.
Politsiia habarlaǵandai, osy oqiǵaǵa bailanysty Qylmystyń kodekstiń 345-i baby 2-shi bóligi «abaisyzda adam densaýlyǵyna aýyr ziian keltirýge ákep soqqan, kólik quraldaryn basqaratyn adamdardyń jol júrisi nemese kólik quraldaryn paidalaný qaǵidalaryn buzýy» boiynsha sotqa deiingi tergeý amaldary bastaldy. Sondai-aq, tiisti saraptama taǵaiyndaldy.
