Aqmola oblysynyń Qosshy qalasynda tárbieshi balany balabaqshada qamap, qaldyryp ketken. Aqmola oblysy bilim basqarmasy oqiǵaǵa túsinik berdi, - dep habarlaidy Tengrinews.kz.
Video avtory jibergen kadrlarda tárbieshi balany qulyptap tastap ketkenin aitady da záýlim balabaqshany kórsetedi.
"Tárbieshi úiinen keldi taksimen. Bala butyna jiberip qoiǵan, ishte jatyr. Balany umytyp ketetin de balabaqsha bolady eken ǵoi? Sonshalyq jýapkershiligi joq pa?", - deidi video avtory.
Aqmola oblysy bilim basqarmasy baspasóz qyzmeti oqiǵa 12 sáýirde bolǵanyn habarlady. "Bolashaq" jekemenshik balabaqshasynyń tárbieshisi 2 jastaǵy Meiirjandy balalardy úige tasityn shaǵyn avtobýs kelgende balabaqshada qaldyryp ketkeni anyqtaldy.
"Saǵat 18:40-ta tárbieshi balalardy shaǵyn avtobýsqa otyrǵyzyp jatqanda, Meiirjan topqa oralǵan, ony balabaqshanyń ishki baqylaý kameralaryndaǵy jazba dáleldeidi. Tárbieshi Meiirjannyń joq ekenin 19:20-da ony aǵasyna tapsyrý kerek kezde baiqaǵan. Keiin birden anasyna keshirim surap habarlasyp, balabaqshaǵa bardy, onda bala balabaqsha hollynda uiyqtap jatqanyn kórdi", - delingen habarlamada.
2 jasar balanyń anasy Qosshy qalasynyń politsiiasyna osy derek boiynsha eshkimge shaǵymy joq ekeni týraly jazbasha ótinish jazǵany habarlandy.
"13 sáýirde bilim bólimi osy derekti anyqtaý boiynsha jumys tobyn qurdy. Tekserý qorytyndysyna sáikes, jumys tobynyń usynysy boiynsha quryltaishy Jumabai meńgerýshisi Baltabaevaǵa qatań sógis jariialady. Al tárbieshi Abdýalieva jumystan shyǵaryldy", - dedi bilim basqarmasyndaǵylar.
Búginde bala anasynyń aryzy boiynsha Qosshy qalasynyń politsiia bóliminde QR 119-baby 1-bóliginde kózdelgen qylmystyq quqyq buzýshylyq belgileri boiynsha qylmystyq is qozǵaldy.
