Aqmola oblysynyń politsiiasy jolda qalǵan Qostanai oblysynyń turǵyndaryna kómek kórsetti, dep habarlaidy "Ult aqparat" Aqmola oblystyq Politsiia departamentiniń baspasóz qyzmetine silteme jasap.
Vedomstvonyń málimetinshe, qatty aiaz ben temperatýranyń tómendeýine bailanysty óńirdiń tártip saqshylary apta boiy avtomobil joldarynda kezekshilik etip, jolda qalǵan júrgizýshiler men jolaýshylarǵa kómek qolyn sozýda.
«Sondai jaǵdaidyń biri, qańtardyń 16-da tirkeldi. Onda Nur-Sultannan Qostanaiǵa baǵyt alǵan «KamAZ» júk kóligi «Jaqsy-Esil-Buzylyq» avtojolynyń 7-shi shaqyrymynda isten shyqqan. Kólik júrgizýshisi men jolaýshysy toǵyz saǵat boiy kómek kútken. Jolai ótip bara jatqan kólikter toqtamaǵan», - dedi vedomstvodan.
Osy kezde, Aqmola oblysy Politsiia departamentiniń patrýldik politsiia batalony qyzmetiniń inspektorlary politsiia leitenanty Qýanysh Toltanov pen Mirat Sháiimov jol shetinde toqtap turǵan kólikti kórip, kómekke kelgen. Anyqtalǵandai kóliktiń akkýmliatory isten shyqqan eken. Sol sebepti, tártip saqshylary jolda ótip bara jatqan ózge júk kóligin toqtatyp, synǵan «KamAZ» kóligin dittegen jerine súirep jetkizýge kómektesti.
