Aqmola oblysy Densaýlyq saqtaý basqarmasynyń basshysy Súlen Iliasov koronavirýs indetinen qaitys bolǵan Tselinograd aýdanynyń turǵyny týraly derekterdi aitty, dep habarlaidy "Ult aqparat".
Belgili bolǵandai, 73 jastaǵy qart adamnyń birneshe sozymaly aýrýy bolǵan. Ol 2 sáýir kúni qaitys boldy. Naýqastyń koronavirýsqa shaldyqqany týraly sot-meditsinalyq saraptamadan keiin anyqtaldy.
Qaitys bolǵan 1947 jylǵy er adam — Tselinograd aýdanynyń turǵyny. Buǵan deiin distsirkýliatorlyq entsefalopatiia diagnozymen tirkeýde turǵan.
Basqarma basshysynyń sózine qaraǵanda, biyl 1 naýryzda naýqastyń kóp aǵzalyq dertine bailanysty jaǵdaiy nasharlaǵan. Bul rette tynys alý, júrek-tamyr qyzmetiniń jetkiliksizdigi joǵarylap, kúretamyrlyq qysym deńgeiiniń joǵary bolǵany baiqaldy.
«2 sáýirde naýqastyń biologiialyq ólimi tirkelip, onyń denesi sot-meditsinalyq saraptama úshin Nur-Sultan qalasyna jetkizildi. Zertteý júrgizý kezindegi sektsiondyq materialda COVID-19 anyqtaldy. Naýqas bolǵan jerde epidemiiaǵa qarsy sharalar júrgizilýde, sondai-aq qarym-qatynasta bolǵan adamdar anyqtalýda», - dedi S. Iliasov.
Budan buryn habarlanǵandai, Aqmola oblysynda koronavirýs infektsiiasynan bir adam qaitys boldy.
