Aqmola oblysynyń negizgi kapitalyna salynǵan investitsiialar kólemi ótken jylmen salystyrǵanda 23 paiyzǵa ósti. Bul týraly óńir ákimi Ermek Marjyqpaev málim etti, dep habarlaidy QazAqparat.
«Óńirde osy jyldyń 10 aiynyń qorytyndysyna sáikes qyzmettiń kóptegen baǵyty boiynsha jaqsy nátijege qol jetkizildi. Ósim, eń aldymen, naqty sektor salalarynyń esebinen qamtamasyz etildi: ónerkásipte – 106,3%, aýyl sharýashylyǵynda - 114,2%, qurylysta-111,7%. Aqmola oblysynyń negizgi kapitalyna salynǵan investitsiialar kólemi ótken jylmen salystyrǵanda 23 paiyzǵa ósti, jyl basynan beri ekonomikaǵa 340 mlrd teńgege jýyq qarjy baǵyttaldy. Bul kórsetkish boiynsha bizdiń oblys elimizdegi úzdik úshtiktiń qatarynda», - dedi ákim Ortalyq kommýnikatsiialar qyzmetinde.
Onyń aitýynsha, daǵdarysqa qarsy sharalar aiasynda shaǵyn jáne orta bizneske jan-jaqty qoldaý kórsetilýde. Atap aitqanda, 20 myńnan astam sýbekt salyq alyp, nesie boiynsha keiinge qaldyrý sharalarymen qamtyldy. Olardyń iskerlik belsendiligin qalpyna keltirý úshin eki baǵdarlama aiasynda 7 mlrd teńgeden astam qarajat bólindi.
«Biznestiń jol kartasy» boiynsha 300 kásipkerge memlekettik qoldaý kórsetildi, «Eńbek» baǵdarlamasy boiynsha 800-den astam mikrokredit pen 700 óteýsiz grant berildi. Óńirlik biznes «qarapaiym zattar ekonomikasy» baǵdarlamasyna belsendi qatysady. Biyl 15,2 mlrd teńgege 120 biznes-joba qarjylandyryldy. Bul ótken jyldan úsh ese kóp. Jobalardy júzege asyrý qosymsha 1300 jańa jumys ornyn ashýǵa múmkindik beredi», - dedi Ermek Marjyqpaev.
Onyń sózine qaraǵanda, Jumyspen qamtý jol kartasyn iske asyrý barysynda jumysqa ornalasý múmkindigi paida boldy, onyń aiasynda 9650 jumys orny quryldy. Eńbek naryǵynda baǵdarlamalardy iske asyrý esebinen barlyǵy 21 myńnan astam jumys orny quryldy, onyń ishinde 13 myńy turaqty.
