Aqmola oblysynda biylǵy jyly barlyǵy 4,9 million gektar alqapqa dán sebiledi. Onyń 91 paiyzy nemese 4 million 889 myń gektary dándi daqyldar úlesinde, dep habarlaidy "Ult aqparat".
QR AShM baspasóz qyzmetiniń málimetinshe, dándi daqyldar ishinde 3,7 million gektardan astamy nemese egis alqabynyń barlyq kóleminiń 77 paiyzyna jazdyq bidai egiledi. Bul byltyrǵy jylmen salystyrǵanda 150 myń gektarǵa artyq.
«700 myń gektar jer astam arpa, suly, jasymyq jáne burshaq egýge bólingen. Óte az kólemde sharýalar tary, qaraqumyq jáne nýt sebedi. Maily daqyldardy 254 myń gektarǵa (2019 jylǵa qaraǵanda 600-ge artyq), aǵymdaǵy jyldyń azyqtyq shópterin 181 myń gektarǵa (3 myńǵa jýyq artyq) ornalastyrý josparlanýda, kartop jáne kókónis alqabyn 2 myń gektarǵa – 20 myńǵa deiin ulǵaitylmaqshy», - deidi vedomstvodan.
Qazirgi kezde, oblysta kóktemgi dala jumystaryna qajetti 530 myń tonna tuqym (qajettiliktiń 100,1 paiyz) bar. Búgingi kúni onyń 425 myń tonnasy akkredittelgen zerthanalarda tekserildi.
Naýqanǵa 14,3 myńnan astam traktor, 16,1 myń tuqym sepkish jáne 1,2 myń birlik ónimdiligi joǵary egis keshenderi jumyldyrylatyn bolady.
Budan bólek, búgingi deiin úkimet tarapynan kóktemgi egis jumystaryna júrgizý úshin óńirge 68 myń tonna kepildi dizel otyny bólinip otyr. Naqtyraq aitsaq, Pavlodar MSZ-dan – 30 myń tonna, Shymkent munai zaýytynan – 32 myń tonna jáne Atyraý MÓZ-nan - 6 myń tonna.
Sonymen qatar, «Agrarlyq nesie korporatsiiasy» AQ jáne kredittik seriktestikter tarapynan tómen paiyzben kóktemgi-egis jumystaryna nesie berý máseleleri sheshildi. «Aýyl sharýashylyǵyn qarjylai qoldaý qory» AQ 6 million teńgege deiingi beretin nesie - shaǵyn sharýashylyq sýbektilerine jaqsy demeý bolady.
Budan basqa, «Azyq-túlik kelisim shart korporatsiiasy» UK» AQ-men birlese otyryp, ótimdi múlik kepildigimen, EDB, «Esil» ÁKK AQ kepildigimen kóktemgi-dala jumystaryna nesie berý máselesi pysyqtalýda.
