Elimizdegi astyqtyń úshten birin óndiretin Aqmola oblysynda óndirispen birge, eksport kólemi artyp keledi. Sońǵy jyldary oblysta astyq eksportynyń kólemi 80 paiyzǵa artqan, dep habarlaidy "Ult aqparat".
Oblystyq aýyl sharýashylyǵy basqarmasynyń málimetinshe, Aqmola oblysy elimizdegi agrarly óńir sanalady.
Respýblikadaǵy astyqtyń úshten biri Aqmola oblysynda óndiriledi. Jyl saiyn 2-2,5 million tonna astyq eksportqa shyǵarylady.
Aqmolalyq astyq negizinen Resei, Qytai, Orta Aziia, Eýropa, Taiaý Shyǵys elderiniń naryǵyna shyǵarylady.
«Búgingi tańda oblystaǵy elevatorlarda 2 million tonnadan astam astyq saqtalǵan. Oblysta egin oraǵy oidaǵydai aiaqtalyp, ár gektardan 11,8 tsenterden astyq alǵanda barlyǵy 5,2 million tonna astyq jinaldy. Alynǵan astyqtyń 90 paiyzy 3-klasty», - deidi oblystyq aýyl sharýashylyǵy basqarmasynyń bólim basshysy Medet Dosjanov.
«QTJ-Júk tasymaly» aktsionerlik qoǵamy oblystyq filialynyń málimetinshe, óńirlerden astyqty vagondarǵa tiep, jedel jóneltý boiynsha turaqty baqylaý sharalary júrgizilýde.
Biyl óńirdiń astyq qabyldaý kásiporyndarynan 2,1 million tonna astyq jáne 165,2 myń tonna un eksportqa jóneltildi.
