Jetisý oblysynda «Raqymshylyq jasaý týraly» zańnyń kúshine enýinen beri 19 204 adam ákimshilik jaýapkershilikten bosatyldy, dep habarlaidy ult.kz.
Oblystyq politsiia departamentiniń málimetinshe, zań 2026 jylǵy 1 shildeden bastap qoldanysqa engizilgen. Ákimshilik raqymshylyq azamattardyń ótinishinsiz, qoldanystaǵy zańnamaǵa sáikes avtomatty túrde júzege asyrylady.
Politsiianyń túsindirýinshe, raqymshylyq ákimshilik quqyqbuzýshylyqtardyń barlyq túrine emes, zańda belgilengen jekelegen sanattarǵa ǵana qoldanylady jáne azamattardy zań talaptaryn saqtaýdan bosatpaidy.
– Raqymshylyq – memlekettiń izgilik qaǵidatyna negizdelgen sheshimi. Ol azamattarǵa óz áreketterine baǵa berip, aldaǵy ýaqytta zań talaptaryn buzbaýǵa múmkindik beredi, – dep málimdedi vedomstvo.
Sonymen qatar tártip saqshylary jol qozǵalysy erejelerin saqtaýdyń mańyzdylyǵyna erekshe nazar aýdardy. Olardyń aitýynsha, árbir júrgizýshi men jaiaý júrginshiniń jaýapkershiligi joldaǵy qaýipsizdikke tikelei yqpal etedi.
Politsiia óńir turǵyndaryn raqymshylyqty zań buzýǵa múmkindik retinde emes, zań talaptaryn qatań saqtaýǵa bastaityn jańa múmkindik dep qabyldaýǵa shaqyrdy.
– Jol qozǵalysy erejelerin saqtaý – zań talaby ǵana emes, adamdardyń ómiri men densaýlyǵyn qorǵaýdyń basty kepili, – dep atap ótti departament ókilderi.
Eske salaiyq, 2026 jylǵy 1 shildede Memleket basshysy Qasym-Jomart Toqaev «Raqymshylyq jasaý týraly» zańǵa qol qoiǵan bolatyn. Qujat qylmystyq jáne ákimshilik raqymshylyqty júzege asyrýmen qatar, ákimshilik raqymshylyqty tsifrlyq formatta iske asyrý tetigin de qarastyrady.
