Arys mańynda bolǵan aýyr jol apatynan keiin 20 jastaǵy stýdent Talǵat Emel eki aiaǵynan aiyryldy. Jábirlenýshiniń týystary taksi júrgizýshisiniń Arys qalasy ákiminiń uly ekenin bilgennen keiin istiń ádil ári ashyq tergelýine alańdap otyr, dep habarlaidy ult.kz.
KTK telearnasynyń jazýynsha, jantúrshigerlik jol apaty 29 mamyrda Astana – Pavlodar tasjolynda bolǵan. Sessiiasyn aiaqtaǵan stýdent ata-anasynyń úiine taksimen qaityp kele jatqanda, kólik apatqa ushyraǵan.
Talǵat aýyr jaraqat alyp, klinikalyq ólim jaǵdaiyn bastan ótkergen. Dárigerler onyń ómirin saqtap qalý úshin eki aiaǵyn da shap tusyna deiin kesýge májbúr bolǵan.
Jábirlenýshiniń ápkesi Gúlsim Abaiildinovanyń aitýynsha, birneshe operatsiia jasalǵanyna qaramastan, Talǵattyń jaǵdaiy áli de aýyr.
"Qazirgi jaǵdaiy nashar. Kóptegen ota jasaldy, eki aiaǵynan aiyryldy. Dárigerler sepsis bastalǵanyn aitty. Jarasyn birneshe ret ashyp, qaita tazalaýǵa týra kelgen. Qan joǵaltqandyqtan, aǵzasynyń immýniteti de álsiregen", – dedi ol.
Júrgizýshi ákimniń uly bolyp shyqqan
Eki qala arasynda jolaýshy tasymaldaǵan 22 jastaǵy taksi júrgizýshisiniń Arys qalasynyń ákimi Qaisar Mańqaraevtyń uly ekeni anyqtalǵan.
Osy jaǵdaidan keiin jábirlenýshiniń jaqyndary laýazymdy tulǵanyń bailanystary tergeý barysyna yqpal etýi múmkin dep qaýiptenip otyr.
"Ákim memlekettik qyzmette otyrǵandyqtan, ár jerde tanystary bolýy múmkin. Tergeýge nemese sotqa qysym jasap, tanystaryn aralastyra ma dep qorqamyz. Biz istiń ádil qaralǵanyn qalaimyz", – dedi Talǵattyń ápkesi.
Arys ákimi ne dedi?
Arys qalasynyń ákimi Qaisar Mańqaraev ulynyń jol apatyna qatysy baryn rastap, qyzmettik ókiletin jeke múddesi úshin paidalanbaitynyn málimdedi.
Onyń aitýynsha, uly kámeletke tolǵan azamat jáne óz áreketi úshin zań aldynda ózi jaýap beredi.
"Men eshqashan qyzmettik ókiletimdi jeke basymnyń múddesi úshin paidalanǵan emespin jáne paidalanbaimyn. Osy is boiynsha tergeýge nemese qabyldanatyn protsessýaldyq sheshimge yqpal etýge áreket jasamaǵanymdy jáne mundai áreketke barmaitynymdy jaýapkershilikpen málimdeimin. Zań aldynda barlyǵy teń", – dedi ákim.
Tergeý jalǵasyp jatyr
Jol apatyna bailanysty taksi júrgizýshisi kúdikti retinde ustalǵan. Qazirgi ýaqytta is sotqa deiingi tergep-tekserý satysynda.
Tergeý jol qozǵalysy erejesin buzý saldarynan adamnyń densaýlyǵyna abaisyzda aýyr ziian keltirý baby boiynsha júrgizilip jatyr.
Kinási dáleldengen jaǵdaida júrgizýshi eki jylǵa deiin bas bostandyǵynan aiyrylýy múmkin. Al Talǵat Emeldiń emi áli jalǵasyp jatyr. Onyń jaqyndary istiń burmalanbai, zań aiasynda ádil qaralýyn talap etýde.
