Búgin QR Densaýlyq saqtaý ministri Aleksei Tsoidyń tóraǵalyǵymen qoǵamdyq baqylaý ókilderimen selektorlyq keńes ótti, dep habarlaidy "Ult aqparat".
Densaýlyq saqtaý ministri atap ótkendei, koronavirýs infektsiiasy búkil álemdegi densaýlyq saqtaý júiesine úlken aýyrtpalyq túsirdi. Qalyptasqan jaǵdaiǵa bailanysty óńirlerde volonterler qoǵamdyq baqylaý tobyn quryp, birneshe ai densaýlyq saqtaý, bilim berý obektileriniń jáne qoǵamdyq oryndardaǵy sanitarlyq normanyń saqtalýyna monitoring júrgizip keledi. Sondai-aq, óńirlik úilestirýshiler gýmanitarlyq júkterdi qabyldaý, ony bólýge belsendi qatysyp otyr.
Vedomstvo aqparatynsha, 383 volonter úsh ai ishinde Qazaqstannyń 17 óńirinde 4 300-den astam monitoringilik is-shara ótkizdi. Olar gýmanitarlyq júkterdi qabyldaýǵa kómektesti, adam kóp jinalatyn oryndarda monitoring júrgizdi, sanitarlyq normalardy buzǵandarǵa qatysty azamattardan túsken shaǵymdarǵa jaýap berdi, densaýlyq saqtaý jáne bilim berý obektilerine monitoring jasady.
«Áleýmettik jelilerdegi monitoring qoǵamdyq baqylaý eriktileri halyq arasynda joǵary bedelge ie ekenin jáne jurt olardyń qyzmetine senim artatynyn kórsetedi», - dedi A. Tsoi.
Sonymen qatar búginde qoǵamdyq baqylaýdy úilestirýshilerdiń memlekettik organ ókilderimen, ásirese óńirlermen bailanysta birqatar qiyndyq bar. Qoǵam ókilderi, ákimdikter, sanitarlyq-epidemiologiialyq qyzmetter men Politsiia departamentteri arasynda naqty ózara is-qimyl men úilestirý joq. Keibir óńirlerde jergilikti atqarýshy organdarmen qoǵamdyq baqylaý tobynyń ózara is-qimyly formaldi túrde ǵana.
«Osyǵan bailanysty biz qoǵam ókilderi men memlekettik jáne jergilikti atqarýshy organdar arasyndaǵy ózara yntymaqtastyq pen úilestirýdi retteýimiz qajet», - dedi ministr.
Kezdesý barysynda qatysýshylar joǵaryda atalǵan máselelerdiń sheshimine qatysty pikir almasty, al Densaýlyq saqtaý ministri óńirlerdegi densaýlyq saqtaý basqarmalarynyń basshylaryna qoǵamdyq baqylaý múshelerin qoldaýdy jáne olarǵa qajetti kómek kórsetýdi tapsyrdy.
