Ákimdikterde baspana kezeginde turǵan azamattardyń bazasy "Otbasy bankke" beriledi. Ákimdikter arqyly kezekke qoiý toqtatylady. Bul týraly Indýstriia jáne infraqurylymdyq damý vitse-ministri Erkebulan Daýylbaev málimdedi, dep habarlaidy Sputnik Qazaqstan.
Ministrlik turǵyn úi saiasatyn reformalaý týraly jańa zań jobasyn ázirlegen. Qazir qujat Parlament Májilisiniń qaraýynda.
Daýylbaevtyń aitýynsha, osy zań jobasy aiasynda esepke alý men basymdyqtardy anyqtaý, sondai-aq tabysqa bailanysty memlekettik qoldaý sharalaryn iske asyrý tetikterin ózgertý josparlanyp otyr.
"Jańa tetikke sáikes, jergilikti atqarýshy organdardyń kezekte turǵandardyń aǵymdaǵy bazasy (623 myń adam) "Otbasy bank" AQ-ǵa beriledi jáne ákimdikter arqyly kezekke qoiý toqtatylady", - dedi vitse-ministr Senatta ótken Úkimet saǵatynda.
Atalǵan zań qabyldanǵannan keiin Turǵyn úimen qamtamasyz etý ortalyǵy qurylady. Osy ortalyqtyń bazasynda sońǵy 10 jyl ishinde baspanasy joq barlyq azamat kezekke turady.
Árbir ótinimge otbasynyń tabysyn, múlki men aktivterin ashatyn tsifrlyq portret qalyptastyrylady.
Daýylbaev ókiletti ministrliktermen birlesip, "Otbasynyń tsifrlyq kartasy" jáne "Smart Data Ukimet" aqparattyq júielerin qoldana otyryp, kezekte turǵan azamattardyń kirisin, nesielerin, jyljymaityn múlik menshikterin qosa alǵanda taldaý boiynsha jol kartasy bekitilgenin atap ótti.
"Nátijesinde muqtajdardy turǵyn úimen qamtamasyz etý kezinde jańa ataýly tásilder ázirlenedi. Turǵyn úimen qamtamasyz etý ortalyǵy memlekettik derekter bazasymen integratsiialanǵan biryńǵai aqparattyq baza bolady", - dedi vitse-ministr.
Aitýynsha, Turǵyn úimen qamtamasyz etý ortalyǵyn qurý esepke qoiý jáne qaryz alý úshin, "turǵyn úige muqtaj" mártebesin rastaý úshin "bir tereze" qaǵidatyn qoldanýǵa múmkindik beredi. Iaǵni birneshe instantsiiaǵa júginýdiń qajettiligi bolmaidy.
Otbasy bank jańa tásilderge sáikes:
- Biryńǵai respýblikalyq elektrondy bazany (aǵymdaǵy baza) júrgizý, monitoringileý jáne ózektendirý;
- Turǵyn úimen qamtamasyz etý ortalyǵy bazasyn qalyptastyrý, júrgizý, monitoringileý, ózektendirý jumystaryn derbes júzege asyrady.
Qazir kezekte turǵandar úshin jalǵa beriletin (jergilikti biýdjet esebinen) jáne kredittik turǵyn úidi bólý esepke qoiý kúni boiynsha júrgiziledi.
Sondai-aq ózektendirilgen tizimdi "Otbasy banktiń" internet-resýrsynda jariialai otyryp, toqsanyna keminde 1 ret tizimdegi kezektilikti tekserý kózdelgen.
