Indýstriia jáne infraqurylymdyq damý ministri Roman Skliar ákimdik kezeginde turǵandarǵa baspana berý týraly aitty, dep habarlaidy Sputnik Qazaqstan.
"Biyl kezekte turǵan adamdarǵa 6 myń páter berý josparlanyp otyr. 1 shildege deiin 924 páter tapsyryldy. Kópbalaly otbasylar úshin jalǵa beriletin turǵyn úilerdiń qurylysyna jáne osy maqsatta daiyn úilerdi satyp alýǵa 50 milliard teńge qarastyrylǵan", - dedi Skliar úkimet otyrysynda.
Ministrdiń aitýynsha, barlyq qarjylandyrý kóziniń esebinen kópbalaly otbasylarǵa 7 482 arendalyq páterdi taratý josparlanyp otyr.
"Mamyr aiynan bastap 1 619 kópbalaly otbasyǵa turǵyn úiler berildi. Nur-Sultan, Almaty men Shymkent qalalarynda jumys jasaityn jastardy baspanamen qamtamasyz etý úshin jylyna 1 000 jaldamaly páter salý jospary bar. Memleket basshysynyń tapsyrmasyna sáikes, osy sanattaǵy turǵyn úilerdi salýǵa jáne satyp alýǵa qarjylandyrý kólemi jylyna 21,6 milliard teńgege ulǵaitylady. Osynyń arqasynda úsh jylda jastar úshin 3 000 páter salynady", - dep atap kórsetti Skliar.
Aita ketsek, jýyrda turmysy tómen kópbalaly otbasylardy satyp alý quqyǵynsyz arendalyq úimen qamtýǵa múmkindik beretin zań qabyldandy. Oǵan sáikes kópbalaly otbasylar ózderi jeke páter satyp alǵansha, memleket bergen úide qalaǵan ýaqytqa deiin tura alady.
