Buǵan deiin ózderi turyp jatqan toǵyz qabatty ǵimarattyń bir jaqqa qarai qisaiǵanyna shaǵymdanǵan Almatynyń "Zerdeli" (burynǵy - Alǵabas-6) shaǵyn aýdanyndaǵy №179 úi turǵyndary bilikten "apatty úidiń" jaramdylyǵyn anyqtap, baspana máselesin sheship berýdi talap etip otyr.
14 jeltoqsanǵa qaraǵan túni "apatty úide" áreń qonyp shyqqan turǵyndar senbi kúni tús kezinde jaqyn mańdaǵy mektepke baryp, bilik ókilderimen turǵyn úidiń jaramdylyǵy máselesin talqylady. Turǵyndardyń aitýynsha, bir apta buryn dabyl qaqqan kezde "ákimdik ókilderi turǵyn úi turýǵa jaramdy" dep aitqan. Al qazir ǵimaratqa túsken syzattar barǵan saiyn úlkeiip barady. Turǵyndar ǵimarat esikteri jóndi jabylmai, birtúrli dybystarǵa da shaǵymdandy.
Qazaq qurylys jáne sáýlet ǵylymi-zertteý jáne jobalaý institýtynyń atqarýshy direktory Erbol Shoqparov turǵyndarǵa sońǵy úsh kúngi derek boiynsha úidiń qisaimai turǵanyn, qazir taǵy zertteý júrip jatqanyn aitty. Onyń sózinshe, qazir úi 7,5 sanimetrge maiysqan.
- Baqylaý júrgizip jatyrmyz. 8 santimetrden assa, dinamika bar, qaýip bar degen sóz. Ázirge úi turýǵa jaramdy, - dedi ol.
13 jeltoqsanda túnde turǵyndardyń qorqyp, syrtta júrgeni týraly aqparatty estigen tilshimiz oqiǵa ornyna barǵan kezde keibir otbasylardyń kóship jatqanyna kýá bolǵan. Ondaǵan adam ǵimarattyń ishine kire almai syrtta júrdi. Keibir azamattar "baratyn jer joǵyn aityp" nalyǵan. Segizinshi qabatta turatyn úsh balasy bar áieldiń aitýynsha, sútti pisirý úshin gazǵa qoiǵan kezde qazandaǵy sút qisaiyp, tógilgen.
Qala ákiminiń orynbasary Muhit Ázirbaev Azattyq tilshisine "problema joq emes - bar, tek qazir sonyń deńgeiin anyqtap jatyrmyz" degen.
2013 jyly "Qoljetimdi baspana" memlekettik baǵdarlamasy boiynsha paidalanýǵa berilgen bul turǵyn úide 72 páter bar.
Almatyda "úilerdiń qisaiý máselesi" osydan birneshe jyl buryn da baiqalǵan. 2016 jyly Alǵabastaǵy toǵyzqabatty turǵyn úidiń 32 santimetrge qisaiǵany anyqtalyp, jergilikti bilik olardy súrý kerek dep málimdegen.
