Qaraǵandyda qalalyq ákimdik ǵimaratynyń terezesinen qulap ketken 37 jastaǵy jumysshynyń ólim sebebi anyqtaldy, dep habarlaidy "Ult aqparat".
Jazataiym oqiǵany tergep-tekserýmen Qaraǵandy oblysynyń Eńbek inspektsiiasy jónindegi basqarmasy qurǵan arnaiy komissiia ainalysty. Vedomstvo onyń nátijelerin málim etti.
«Qaraǵandy qalasy ákiminiń apparaty» MM qyzmetkerimen bolǵan qaiǵyly jazataiym oqiǵa faktisi boiynsha arnaiy tergeý júrgizildi. Komissiia kelesi sebepterdi anyqtady: jumys berýshi tarapynan tiisti baqylaýdyń bolmaýynan jumys óndirisiniń qanaǵattanarlyqsyz uiymdastyrylýy, zardap shegýshiniń eńbekti qorǵaý jáne qaýipsizdik tehnikasy jónindegi nusqaýlyqtardyń talaptaryn saqtamaýynan bolǵan óreskel abaisyzdyq«, - dep habarlady Qaraǵandy oblysynyń Eńbek inspektsiiasy jónindegi basqarmasynan.
Komissiia jumysynyń nátijeleri politsiiaǵa joldandy. Óńirdiń Eńbek inspektsiiasy jónindegi basqarmasy quqyqqorǵaý organdary QR zańnamasyna sáikes tiisti sheshim qabyldaitynyn qosyp ótti.
Eske salaiyq, biylǵy 19 sáýirde Qaraǵandy ákimdigi ǵimaratynyń tórtinshi qabattaǵy terezesinen 37 jastaǵy jumysshy qulap ketken bolatyn. Ol jedel meditsinalyq kómek kelgenge deiin kóz jumdy.
