Foto: Kazinform
Ákimderge avtoturaqtardy uiymdastyrý jáne olardyń sanattaryn aiqyndaý qaǵidalaryn bekitý quzyreti berilmek. Bul jaiynda Májilis depýtattarynyń saýalyna Premer-Ministrdiń birinshi orynbasary Roman Skliardyń jaýabynda aitylǵan, dep habarlaidy «Ult aqparat» Kazinform-ǵa silteme jasap.
«Qazirgi ýaqytta avtoturaqtardy (avtomobil qoiatyn oryndardy) uiymdastyrý tártibi Almaty jáne Astana qalasy aýmaǵynda ǵana ákimderdiń qaýlylarymen bekitilgen. Qaǵidalarǵa orai avtoturaqtardy (avtomobil qoiatyn oryndardy) uiymdastyrý jáne paidalaný qurylys normalarynyń, órt qaýipsizdigi salasyndaǵy tehnikalyq reglamentterdiń, sanitariialyq jáne ekologiialyq normalardyń talaptaryna sáikes, sondai-aq jer ýchaskesiniń nysanaly maqsatyn saqtai otyryp júzege asyrylady. Astana qalasy ákimdiginiń aqparatyna sáikes, aqyly kommýnaldyq avtoturaqtar qalanyń ortalyq aýdandarynda, halyq tyǵyz shoǵyrlanǵan núkteleri kólik toraptarynda, saýda oiyn-saýyq ortalyqtarynda, ákimshilik keshenderde jáne taǵy da basqa jerlerde ornalasqan», — dedi birinshi vitse-premer jaýabynda.
Onyń atap ótýinshe, elordanyń shekaralas aýdandarynda jáne áleýmettik mańyzy bar obektilerde (aýrýhana, emhana, mektep, balabaqsha jáne t. b.) jáne turǵyn úilerdiń aýlalarynda aqyly kommýnaldyq avtoturaqtar joq. Aqyly kommýnaldyq avtoturaqtarǵa irgeles ornalasqan úilerdiń turǵyndaryna tegin turaq quqyǵyn beretin rezidenttik abonementter beriledi.
«Almaty qalasy ákimdiginiń aqparatyna sáikes aqyly kommýnaldyq avtoturaqtar qalanyń tarihi iskerlik ortalyǵynda, sondai-aq kórikti jerlerge jaqyn aýmaqta ornalasqan. Sonymen qatar Shymkent qalasynda jáne basqa oblystarda avtoturaq (avtomobil qoiatyn oryndardy) uiymdastyrý tártibin retteitin normativtik-quqyqtyq akt joq. Osyǵan orai, qazirgi ýaqytta Májiliste qaralyp jatqan astananyń jáne respýblikalyq qalalardyń damýy máseleleri boiynsha zań jobasy aiasynda oblys, respýblikalyq mańyzy bar qalalardyń ákimderin avtoturaqtardy (avtomobil qoiatyn oryndardy, parkingterdi) uiymdastyrý jáne olardyń sanattaryn aiqyndaý qaǵidalaryn bekitý quzyretin berý bóliginde zańnamalyq túzetýler engizý kózdelgen», — dedi Roman Skliar.
Buǵan deiin «jol qozǵalysyndaǵy quqyq buzýshylyqtar avtomatty túrde anyqtalatyn buzýshylyqtar tizbesinen alyna ma» degen saýalǵa jaýap alǵan edik.
