Ákimderdiń halyqpen kezdesýinde daiyn suraqtardyń qoiylýyna jol berýge bolmaidy. Bul týraly QR Ulttyq ekonomika vitse-ministri Baýyrjan Omarbekov aitty, dep habarlaidy QazAqparat.
«Aldyn ala daiyndalǵan adamdardyń ákimderge suraq qoiýyna eshqandai da jol berýge bolmaidy. Aýditoriiany qadalaǵan kezde ákimdikke jaqyn, ákimdiktiń sózin sóileitin adamdardy emes «kelemin», «qatysamyn» degen belsendi adamdardyń kezdesýge kelip qatysýyna bolady. Kez kelgen esepti bolsyn, turaqty bolsyn kezdesýge kelip qatysamyn degen adamǵa eshkim shekteý qoia almaidy. Ókinishke orai beiresmi shekteýlerdiń bolǵany ras. Biraq, aldaǵy ýaqytta jergilikti atqarýshy bilikpen bul máseleni sheshemiz. Ony Ulttyq ekonomika ministrligi ǵana emes Prezident ákimshiligi de jiti qadaǵalap otyrady», - dedi vitse-ministr «Habar-24» telearnasyndaǵy «Suhbat» baǵdarlamasynda.
Onyń atap ótýinshe, jergilikti jerlerde mundai shekteýler bolǵan jaǵdaida zań aiasynda tiisti is-shara qabyldanady.
Sonymen qatar ol ákimderdiń azamattardy jeke qabyldaý kúnderin ulǵaitý máselesi de qaralǵanyn aitty.
«Ákimniń kezdesýi ótkennen keiin ol azamattardy jeke qabyldaýy tiis. Jeke qabyldaýǵa kim qatysa alady? Sol jiynǵa kelgen kezde saýal joldaýǵa ýaqyty jetpegen, qoiǵan suraǵyna tiisti jaýap ala almaǵan adamdar jeke qabyldaýǵa kire alady. Ol jerde tek ákim ǵana emes, jergilik atqarýshy biliktiń ókilderi, prokýratýra, ishki ister organdarynyń qyzmetkerleri, máslihat depýtattary, qoǵamdyq keńes músheleri, ziialy qaýym ókilderi kóterilgen máseleni der ýaqyty sheshýge tyrysady», - dedi Baýyrjan Omarbekov.
