Keibir aýmaqtar ákimderiniń karantindi jáne shekteý is-sharalaryn ýaqtyly qoldanbaýy jergilikti jerlerdegi epizootiialyq ahýaldyń nasharlaýyna ákeldi. Bul týraly Májilistegi Úkimet saǵatynda QR Aýyl sharýashylyǵy ministri Erbol Qarashókeev málim etti, dep habarlaidy QazAqparat.
«Memleket basshysy 2021 jylǵy 1 qyrkúiektegi «Halyq birligi jáne júieli reformalar – el órkendeýiniń berik negizi» atty Qazaqstan halqyna Joldaýynda veterinariia júiesin reformalaý boiynsha naqty mindetter qoidy. Olar: ortalyq pen óńirler arasyndaǵy fýnktsiialar men ókilettikterdiń ara jigin naqty ajyratý, protsesterdi tsifrlandyrý jáne derekterdi jinaý men berýdi avtomattandyrý, kadrlar daiarlaý jáne jalaqyny arttyrý. Ministrlik qoiylǵan mindetterdi oryndaý úshin biylǵy jaǵdaiǵa muqiiat taldaý júrgizdi jáne veterinariia júiesin reformalaý úshin qajetti is-sharalar ázirledi», - dedi Qarashókeev.
Onyń aitýynsha, usynylǵan is-sharalar sarapshylar qaýymdastyǵymen, ákimdiktermen, memlekettik organdarmen, biznespen, salalyq qaýymdastyqtarmen talqylandy. Jumys tobynyń onnan astam otyrysy, onyń ishinde óńirlerge kóshpeli otyrystar ótkizildi. Sondai-aq, barlyq negizgi reformalar boiynsha Úkimet pen Prezident Ákimshiliginde talqylaý júrgizilip, onda negizgi tásilder maquldandy.
«Budan basqa, ministrliktiń bastamasy boiynsha 2021 jylǵy naýryzdan qyrkúiekke deiin Qazaqstan Respýblikasy úshin Dúniejúzilik janýarlar densaýlyǵy uiymy halyqaralyq sarapshylarynyń eki missiiasy ótkizildi, olardyń qorytyndylary boiynsha biz Qazaqstannyń veterinariia qyzmetiniń jumysyn kúsheitý jóninde tiisti usynymdar aldyq.
Reformalardy engizýdi kezeń-kezeńmen júzege asyrý josparlanýda, bul veterinariialyq qyzmet jumysynyń tiimdiligin arttyrýǵa jáne bolashaqta ony jańa sapaly deńgeige kóterýge múmkindik beredi», - dedi ministr.
Veterinariia boiynsha reformalardy ázirleýdiń bastapqy kezeńinde normativtik-quqyqtyq aktilerdegi qaishylyqtarǵa, sondai-aq veterinariialyq zańnamanyń sol nemese ózge de normalaryn praktikada qoldanýdyń jetilmegendigine taldaý júrgizildi.
«Epizootiialyq oshaqtardy zerttep-qaraýdy júrgizý bóliginde qadaǵalaý jáne iske asyrý fýnktsiialarynyń egjei-tegjeili fýnktsionalynyń bolmaýy, tiisti aýmaqtar ákimderiniń karantindi jáne shekteý is-sharalaryn ýaqtyly qoldanbaýy jergilikti jerlerdegi epizootiialyq ahýaldyń nasharlaýyna ákeldi, ásirese karantindi belgileý kezinde. Karantindi belgileý 90 kúnge deiin keshiktirilgen faktiler bar, sáikesinshe oshaqty joiý is-sharalary ýaqtyly júzege asyrylmady, bul infektsiianyń taralýyna ákeldi», - dedi vedomstvo basshysy.
