Keshe biraz aýys-túiis bolyp, Úkimettiń jańa quramy bekitildi. Memleket basshysy Premer-ministr laýazymyna Asqar Mamindi usynyp, jańa mindetter júktedi. «Qazir kúrdeli kezeń. Aldymyzda mańyzdy mindetter tur. Alǵa jyldam umtylýymyz kerek» dep qadap aitty. Sóitip, Úkimettiń jańa komandasy jasaqtaldy. Qanshalyqty sátti tańdaý bolǵany ýaqyt enshisinde.
Elbasy eldegi sońǵy jaǵdailarǵa bailanysty memlekettik apparatty jańartýǵa kiristi. Ministrler kabinetinen bastalǵan ózgeris ákimder korpýsyna da óz áserin bermek. Ult portaly aldaǵy ózgeristerdiń aldyn alyp, az-kem boljam jasaýdy jón kórdi.
Túrli boljamdarǵa sensek, ózgeristiń basy Prezident Ákimshiliginen bastalmaq. Áset Isekeshevtiń QR Prezidenti ákimshiliginiń basshysy bolyp taǵaiyndalǵanyna kóp ýaqyt ótpese de, jańa jetekshiniń kelýine qatysty áńgime áli basylmai tur. Bul laýazymǵa Almaty qalasy ákimi Baýyrjan Baibek taǵaiyndalýy múmkin eken. Úkimetbasylyqtan úmitti tulǵalardyń biri sanalǵan Baýyrjan Qydyrǵaliuly eldegi eń mańyzdy oryndardyń birine jaiǵasyp, jańa jaýapkershilikti arqaǵa artpaq.
Eger Almaty ákimi aýysatyn bolsa, bul orynǵa Áset Isekeshevtyń ózi ne eks-premer Baqytjan Saǵyntaev otyrýy múmkin.
Baqytjan Ábdirulynyń basqa da aimaqtardyń birine baryp, ákimdik qyzmetti qolǵa alýyn boljaityndar barshylyq. Degenmen qazirgi joramal burynǵy Úkimet basshysy Almaty shaharyna qonys aýdarady degen oiǵa negiz súieidi.
Keshe QR Memlekettik hatshysy qyzmetin atqaryp kelgen Gúlshara Ábdihalyqova vitse-premerlikke oiysyp, jańa jumysqa kiristi. Dál qazir bul oryn bos tur. Keibir saiasatkerler bul qyzmetke Qyzylorda oblysy ákimi Qyrymbek Kósherbaev, Mańǵystaý oblysy ákimi Eraly Toǵjanov jáne eks-ministr Darhan Káletaev úshtiginiń biri keledi dep boljap otyr. Desek te, bul laýazymǵa qatysty kútpegen sheshim qabyldanýy áste múmkin.
Derekkózderi kórsetkendei, keshe ǵana QR Premer-ministriniń orynbasary – Aýyl sharýashylyǵy ministri bolǵan Ómirzaq Shókeev Túrkistan oblysynyń tizginin ustamaq. Elbasy Túrkistan oblysynyń áleýmettik-ekonomikalyq damý máselelerin ári qarai júieli júrgizý úshin kórgen-túigeni, bilim-biligi mol jańa basshynyń kelýine múddeli.
Al, oblys ákimi Janseiit Túimebaev Astanaǵa at basyn tirep, jańa taǵaiyndaýlardyń birine iek artady. Máselen, sý jańa ministr Kúlásh Shámshidinovanyń ornyna «Nazarbaev Ziiatkerlik mektepteri» DBBU Basqarmasyna basshy bolý múmkindigi joǵary. Odan bólek, depýtattyq mandatqa da almasý yqtimaldyǵy joq emes. Tipti Túimebaevty Memlekettik hatshy bolýǵa laiyq kóretinder de jeterlik.
Keshegi aýys-túiis Aqtóbe oblysy ákimi Berdibek Saparbaevty Astanaǵa aldyrdy. Áleýmettik saladaǵy túiitkildi máseleler qordalana túskennen keiin, tájiribesi mol, saiasi salmaǵy basym Saparbaevqa senim artyldy. Berdibek Mashbekulyna bul sala tańsyq emes. 2007 jyly Eńbek jáne halyqty áleýmettik qorǵaý ministriliginiń tizginin ustap, eki jyldai jemisti eńbek etti. Sol sebepti, áleýmet aldyndaǵy jaýapkershilikti abyroimen kóterip, kúrdelengen máselelerdiń kúrmeýi sheshilerine senim mol. Berdibek Saparbaevtyń ministr retindegi alǵashqy sapary Jańaózennen bastalsa dep, halyqqa bastar joldy nusqap jatqandardyń sany az emes. Bul tilekke ie kópshilik keshe ǵana kóshege shyqqan jumyssyz halyqtyń máselesi ońynan sheshilse deidi...
Saparbaev ministr bolǵannan keiin, onyń ornyn kim basady degen suraqtyń mańyzy artty. Boljam jasaýshylar óz nusqasyn usynyp, oiyn ortaǵa salyp jatyr.
Bul orynǵa QR Prezidenti Ákimshiligi Basshysynyń orynbasary Orazalin Ońdasyn Seiiluly nemese BQO ákimi Altai Kólginov kelýi múmkin kórinedi.
Sondai-aq, Qoǵamdyq damý ministri bolǵan Darhan Káletaev Shyǵys Qazaqstan oblysyna barady dep kútilýde. Al, zeinet jasyndaǵy Danial Ahmetovtyń senatorlar qataryn toltyrýy múmkin ekendigin buǵan deiin de jazǵan bolatynbyz.
Ózge óńirlerden taǵy birneshe oblys basshysy jyly ornyn sýytýy múmkin. Atap aitsaq, Almaty, Qostanai, Atyraý oblystary jańa basshynyń taǵaiyndalýyna tas-túiin daiyn otyr.
Árine, munyń bári boljam ǵana. Naqty saiasi ózgeristerdiń sheshimi Aqordanyń quzyrynda.
