Aýyl ákimderin tikelei sailaý árbir qazaqstandyqqa óziniń partiialyq qatysýyna qaramastan konstitýtsiialyq quqyǵyn júzege asyrýǵa múmkindik beredi.
Bul pikirdi «Kaisar-kz» QB tóraǵasy, Pavlodar oblysyndaǵy partiialyq emes baqylaý ortalyǵynyń tóraǵasy Alma Qozbaeva bildirdi, dep habarlaidy QazAqparat.
«Táýelsiz Qazaqstan tarihynda alǵash ret ókilettik merzimi aiaqtalǵan aýyldyq okrýg ákimderiniń tikelei sailaýy ótip jatyr. Aýyl ákimderin tikelei sailaý árbir qazaqstandyqqa óziniń konstitýtsiialyq quqyǵyn partiialyq qatysýyna qaramastan júzege asyrýǵa múmkindik beredi. Jergilikti turǵyndar árdaiym aýyldyq máselelerdi sapaly sheshýge múddeli, qazir bizde tikelei qatysyp qana qoimai, jumys nátijelerine áser etý múmkindigi de paida bolady. Ózin-ózi usynýshylarǵa sailaýǵa qatysý múmkindigi búkil sailaý protsesiniń básekeli ótýine jańa serpin beredi. Bul sharanyń biregeiligi sonda, turǵyndar búkil protsesti baqylai alady. Naqty kandidatqa daýys berip, ákimdi sailaidy, eger turǵyndar ákim óziniń laýazymdyq mindetterin atqarmaidy dep sanasa, oǵan senimsizdik votýmyn bildire alady. Olar sailaýshynyń quqyqtaryn tolyq paidalana alady», - dep atap ótti spiker.
Onyń aitýynsha, tikelei sailaý kezinde saiasi partiialardyń, halyqtyń jáne sailanǵan ákimniń jaýapkershiligi arta túsedi.
«Jańadan sailanǵan ákim óz sailaýshylary aldyndaǵy jaýapkershilikti tolyq sezinýi tiis. Sonymen birge, ózin-ózi usynýshylar daýys berýge quqyǵy bar sailaýshylardyń keminde 1%-ynan qol jinaý arqyly sailaýǵa qatysýǵa úmitker bola alady. Bul – ádil kúreske qatysqysy keletinder úshin jeńiske jetýdiń úlken múmkindigi. Joǵaryda aitylǵan ózgerister azamattardyń belsendiligi men sana-sezimine áser etedi. Árbir qazaqstandyq óziniń sailaýǵa qatysýy men aýyl bolashaǵy ózara bailanysty ekenin túsinýi tiis. Elimizdiń árbir azamatyna jeke jaýapkershilik artatyn kez keldi, óitkeni Qazaqstan – jalǵa alynǵan úi emes, óz úiimiz», - deidi Alma Qozbaeva.
Aita keteiik, Pavlodar oblysynda sailaý protsesin partiiadan tys 400-den astam baiqaýshy baqylap otyr. Partiialyq emes baqylaý ortalyǵyna tórt qoǵamdyq birlestik kirgen. Búginde olar ýchaskelik komissiialardyń jumysyna ǵana emes, partiialyq baiqaýshylardyń jumysyn da qadaǵalaidy, daýys berý protsesin baqylaidy.
