QR Prezidenti Ákimshiligi Basshysynyń orynbasary Málik Myrzalin Habar-24 arnasyna bergen suhbatynda ákim sailaýyna túsetin kandidattarǵa qoiylatyn talaptardyń sebebin túsindirdi, dep habarlaidy QazAqparat.
«Sailaýdy 2346 okrýgte ótkizý josparlanǵan. Bul - óte úlken san. Osy okrýgterde 7,5 millionnan astam turǵyn bar. Osynsha adamdy basqarý úshin daiyndyǵy bar adamdar kerek. Olardyń sáikes bilimi, eńbek tájiribesi, biliktiligi bolýy tiis. Bul eldi mekenderdiń ishinde shaǵyndary da bar. Mysaly, Aqmola oblysy Egindikól aýdanynyń Abai aýylynda 49 adam ǵana turady. Sol aýyl da ákimin sailaǵaly otyr. Al Jambyl oblysy Almaty aýdanynyń Uzynaǵash aýylynda 50 myńnan astam adam bar. Mundai turǵyn kóp aýyldy basqarý úshin tiisti qabyletteri bar adam kerek», - degen Prezident Ákimshiligi Basshysynyń orynbasary qoldanystaǵy Jergilikti jáne ózin-ózi basqarý zańy boiynsha aýyldyq okrýg ákimderinen 54 quzyret talap etiletinin eske saldy.
«Qandai úlken jumys kútip turǵanyn elestetińizshi. Mysaly qarańyz, aýyldyq okrýg ákimi salyq tólemderiniń ýaqtyly túsýine yqpal etýi kerek. Jer qatynastaryn rettep, avtomobil joldaryn kútip ustaý men jóndeýdi qamtamasyz etedi. Sharýa qojalyqtary men fermerlikterdiń qurylýyna yqpal etedi. Eldi mekenderdi sýmen qamtýdy uiymdastyryp, abattandyrý, kógaldandyrý, sanitarlyq tazalyqqa jaýapty bolady. Az qatylǵan otbasylardy anyqtap, joǵary satydaǵy organdarǵa olarǵa jumys berý jáne ataýly áleýmettik kómek tóleý týraly usynystar túsiredi. Jalǵyzilikti, eńbekke jaramsyz egde jastaǵy azamattarǵa qyzmet kórsetýdi uiymdastyryp, múmkindigi shekteýli jandarǵa kómek kórsetedi. Mine, osy siiaqty 54 quzyreti bolýy kerek», -dedi ol suhbat barysynda.
Málik Myrzalin 2020 jyly búkil Qazaqstan boiynsha biýdjettiń tórtinshi deńgeii iske qosylǵanyn atap ótti.
Iaǵni, sailanatyn ákimderdiń qaramaǵynda aitarlyqtai qomaqty qarjy bolady.
Aitýynsha, bul da kandidattarǵa qoilatyn talaptyń naqtylyǵyn qajet etken.
«Aýyldyq okrýgtiń biýdjetine 5 salyqtyq jáne 10 salyqtyq emes túsim kiredi. Iri aýyldyq okrýgterdiń biýdjeti 1 mlrd teńgege deiin jetedi. Osynsha aqshany duys basqaryp, sybailas jemqorlyq qaterlerine ilikpeý úshin daiyndyǵy bar adamdar kerek dep oilaimyn. Sondyqtan, tiisti biliktilik talaptarynyń bolý durys dep oilaimyn», - dedi ol.
