Aýdandyq mańyzy bar qalalardyń, aýyldardyń, kentterdiń, aýyldyq okrýgterdiń 730 ákimin sailaýǵa túsetin úmitkerlerdi tirkeý aiaqtaldy, dep habarlaidy QazAqparat.
Kandidattardy usyný 9 shilde saǵat 18:00-ge deiin jalǵassa, olardy tirkeý 14 shilde kúni jergilikti ýaqytpen saǵat 18.00-de aiaqtaldy jáne birden úgit-nasihat jumystary bastaldy. Zańǵa engizilgen ózgertýler men túzetýler boiynsha, úgit-nasihat 24 shilde saǵat 00.00-ge deiin jalǵasady.
Naýqan bastalǵaly beri respýblika boiynsha eki myńnan astam úmitker tirkelgen. Sailaý jariialanǵan okrýgter sanynyń kóptigine bailanysty kandidattardyń eń kóbi Aqmola, Qaraǵandy, Almaty jáne Shyǵys Qazaqstan oblystarynda usynyldy. Kandidattardyń eń azy Mańǵystaý, Atyraý jáne Batys Qazaqstan oblystarynda.
Aita keteiik, 25 shildede elimizdiń birqatar óńirinde ákimderdiń sailaýy bastalady. Sailaý naýqanynyń jalpy merzimi – 30 kún. Al is basyndaǵy ákimniń ókilettik merzimi aiaqtalǵan jaǵdaida sailaý 40 kún buryn jariialanady jáne jumys istep turǵan ákimniń ókilettik merzimi aiaqtalǵanǵa deiin 10 kún buryn ótýi tiis.
2021 jyldan bastap aýyl ákimderiniń tikelei sailaýyn ótkizý týraly Prezident Qasym-Jomart Toqaevtyń «Qazaqstan Jańa naqty ahýalda: is-qimyl ýaqyty» atty Joldaýynda tapsyrma berilgen bolatyn.
Resmi statistika boiynsha, Qazaqstan halqynyń 40%-dan astamy aýyldyq eldi mekenniń turǵyny retinde tirkelgen. Iaǵni aýyldyq aýmaqtardy basqarýdyń tiimdi tetigin qalyptastyrý isine Qazaqstan azamattarynyń 40%-dan astamy atsalyspaq.
