"Batys Qazaqstan oblysy Bókei Ordasy aýdanynyń 111 sharýa qojalyǵy Resei áskerileriniń Qazaqstannan jalǵa alǵan jerlerinde mal baǵyp, shóp shabady", dedi búgin aýdan ákimi Nurlan Raqymjanov aimaqtyq kommýnikatsiia qyzmetinde.
Ákimniń sózinshe, aýdannyń bir million gektardan asatyn territoriiasynyń 945 gektar aýmaǵyn reseilik áskeriler jalǵa alǵan. Poligon esebinde jalǵa alǵan jer qaýiptiligi jaǵynan úsh kategoriiaǵa bólinedi. Birinshi kategoriiadaǵy jerde reseilik áskeri bólimder ornalasqan. Ol territoriiaǵa kirýge tyiym salynǵan. Ekinshi jáne úshinshi kategoriiadaǵy territoriialarda 111 qojalyq ornalasqan. Ol aýmaqtarda jergilikti malshylar men fermerler "mal baǵyp, shóbin shabady". Qaýiptiligi ekinshi kategoriiaǵa jatatyn jerde "áskeri synaq jasalatyn kezde malshylar ol aýmaqtan shyǵa turýǵa májbúr bolady jáne úlken qurylys salýǵa bolmaidy".
- Synaq kezinde territoriiadan tez arada shyǵyp ketý kerek. Malshylardyń synaq bastalǵany týraly der kezinde habarlanbai, territoriiadan shyǵyp úlgermei qalatyn kezderi de bolady. Árqashan bailanys bola bermeidi, - dedi Nurlan Raqymjanov.
Aýdan ákiminiń málimetinshe, jergilikti bilik úshinshi kategoriiadaǵy jerlerdi qaitaryp alý jumysyn júrgizip jatqanymen, ázirge 400 gektar jer qaitarylǵan. Munda qiyrshyq tas óndirý josparlanǵan.
Budan ózge aýdan ákimi 16 myń halqy bar Bókei Ordasy aýdanynda 503 múgedek baryn, olardyń 138-i bala kezden múgedek, 58-i kámeletke tolmaǵandar ekenin aitty. Olardyń barlyǵyna ai saiyn qai topqa jatatynyna bailanysty áskeri-synaq poligony saldarynan zardap shegýshi retinde 12 myń teńgege deiin ótemaqy tólenedi.
SSSR qulaǵan soń Resei Qazaqstannyń birneshe million gektar jerin poligon retinde jalǵa paidalanyp keledi. Batys Qazaqstan oblysynyń bir bóligin Reseidiń Kapýstin Iar áskeri poligony alyp jatyr.
Sanat Oryn Áli
