Foto: Sputnik / Valerii Melnikov
Jýyrda Prezident Qazaqstanda 46 óńirlik teatr jumys isteitinin, olardyń kóbiniń jaǵdaiy syn kótermeitinin atap ótip, qazir halyqtyń teatr ónerine degen qyzyǵýshylyǵy artyp kele jatqanyn aitty. Aimaqtaǵy teatrlardyń jaǵdaiy máz emes. Prezident kásipkerlerdi aimaqtaǵy teatrlardy qoldaýǵa shaqyrdy. Ult.kz tilshisi aimaqtaǵy teatrlardyń jaǵdaiyn anyqtap kórdi.
Prezident óz sózinde: «Qazaqstanda 46 aimaqtyq teatr bar, alaida onyń kópshiliginiń jai-kúii máz emes. Mysaly, Semeide bir ǵimaratta úsh birdei teatr syǵylysyp otyr. Ásirese aimaqtarda teatrlardy damytýǵa basa nazar aýdarý kerek», dedi.
Qazir Semeide teatr ǵimaratynda úsh ujym (Abai atyndaǵy qazaq mýzykalyq drama teatry, Dostoevskii atyndaǵy orys drama teatry, «Dariǵa-ai» jastar teatry) ornalasqan. Bul ǵimarattyń ózi sáýlet eskertkishi.
Semeilik aqyn Merei Qart bul qalanyń halyqtyń mádeni-rýhani ordasy ekenin atap ótti.
Foto: abai.kz
«Semei – halyqtyń mádeni-rýhani ordasy. Qazaq teatrynyń qara shańyraǵy atanǵan Alash rýhaniiatynyń astanasy Semeige birneshe teatr oshaǵyn salý qajet. Bul jospardy aldaǵy bes jyldyqqa kirgizse nur ústine nur bolary anyq. Qazir teatrǵa halyqtyń suranysy joǵary, kórermen qarasy qalyń. Bul – teatrdaǵy qoiylymdar sapasynyń tartymdylyǵy, áitpese halyq kóńilinen shyǵý múmkin emes. Bul salaǵa qyzyǵýshy jastar legi kóp-aq. Alaida óz kúnin ózi kórýge jetpeitin jalaqymen júre almaitynyn sezetin jastar amalsyzdan basqa salaǵa ketip jatyr. Alashtyń astanasy bolǵan qart Semeige mádeni oshaqtardyń kóptep salynýy asa qajet der edim. Kezinde dana Abai meken etken, alashtyqtar bas qosqan qalanyń gúldenip kórkeiýin halyq bolyp qoldary anyq», – deidi semeilik aqyn, Abai kitaphanasynyń direktory Merei Qart.
Al úshinshi megapolis bolǵan Túrkistan oblysynyń ortalyǵy Túrkistan qalasynda eki teatr: Raiymbek Seitmetov atyndaǵy Túrkistan qalasynyń sazdy drama teatry jáne Túrkistan mýzykalyq drama teatry jumys isteidi. Jańa ortalyq bolǵandyqtan ba, bul shahardaǵy teatrlardyń jaǵdaiy jaman emes. Bul týraly Túrkistan qalasyndaǵy A.Iasaýi atyndaǵy HQTÝ-diń jýrnalistika kafedrasynyń aǵa oqytýshysy Átirgúl Táshim aityp berdi.
Foto: Átirgúl Táshimniń facebook paraqshasynan
«Raiymbek Seitmetov atyndaǵy Túrkistan qalasynyń sazdy drama teatrynyń repertýarynda eresekterge arnalǵan – 66, balalarǵa arnalǵan – 22 qoiylym bar. Raiymbek Seitmetov atyndaǵy Túrkistan qalasynyń sazdy drama teatrynyń ashylǵanyna kelesi jyly – 25 jyl. Teatr aitýly belesinde, iaǵni 26-maýsymdy dramatýrg Dýman Ramazannyń Qoja Ahmet Iasaýi tulǵasyna arnalǵan dramasymen ashyp, ony qazaq jáne túrik tilderinde sahnalaýdy josparlap otyr. Al Túrkistan mýzykalyq drama teatry "qalanyń jańa teatry" dep atalyp ketken. Búginde teatr qorjynynda jiyntyǵy 11 qoiylym bar. Bizdegi eki teatrdyń da jai-kúii jaman emes, jańasy. Qazaqstanda kezdese bermeitin tehnikalyq múmkindigi bar ǵimarat. Raiymbek Seitmetov atyndaǵy Túrkistan qalasynyń sazdy drama teatryn byltyr kúrdeli jóndeýden ótkizip berdi. Jańa teatrymyz jaqynda «Túrkistan» degen kásibi ansambliniń tusaýkeser kontsertin berdi. Jetekshisi A.Balajanova, ártisteri de aspaptary da óte kásibi eken», – deidi A.Iasaýi atyndaǵy HQTÝ-dyń jýrnalistika kafedrasynyń aǵa oqytýshysy Átirgúl Táshim.
Qazaqstandaǵy aimaqtyq teatrlardyń ahýaly sońǵy jyldary birshama ózgeris pen damý kezeńinen ótip jatyr. Aimaqtyq teatrlardyń kópshiligi ózderiniń biýdjettik qarjysyn tolyqtai oblys nemese qala biýdjetinen alatyndyqtan, qarjylyq máseleler óte ózekti. Teatr kóbine qosymsha demeýshilik kómekke, memlekettik grantqa nemese jekemenshik qoldaýǵa táýeldi.
Aqbota Musabekqyzy
