QR Sybailas jemqorlyqqa qarsy is-qimyl agenttiginiń tóraǵasy Marat Ahmetjanov BUU Bas Assambleiasynyń 32-shi arnaiy sessiiasynda sybailas jemqorlyqtyń aldyn alý, oǵan qarsy kúres jáne halyqaralyq yntymaqtastyqty kúsheitý salasyndaǵy syn-qaterler men sharalar boiynsha sóz sóiledi, dep habarlaidy "Ult aqparat" vedomstvonyń baspasóz qyzmetine silteme jasap.
BUU Bas Assambleiasynyń osy máselege arnalǵan arnaiy sessiiasy alǵash ret ótýde.
Antikor basshysy óz sózinde Táýelsizdik jyldary Qazaqstanda sybailas jemqorlyqqa qarsy is-qimyl máselelerinde eleýli jumys júrgizilgenin atap ótti. Iske asyrylǵan sharalardyń arqasynda Qazaqstan eki jyl ishinde Dúniejúzilik Banktiń sybailas jemqorlyqty baqylaý indikatory boiynsha kórsetkishin eki eseden astam jaqsartty, Transparensi Interneshnl sybailas jemqorlyqty qabyldaý indeksi boiynsha ósim 30 oryndy qurady.
Onyń aitýynsha, sybailas jemqorlyqqa qarsy is-qimyl salasyndaǵy jumystyń tiimdiligin arttyrý boiynsha jumys jalǵasýda.
Máselen, búginde sybailas jemqorlyqqa qarsy bastamalar – elimizde júrgizilip jatqan aýqymdy ózgeristerdiń bir bóligi. Bir jaǵynan, qaýipsiz qylmysty alǵash ret jasaǵandarǵa zańnyń repressivtiligi tómendese, ekinshi jaǵynan, sybailas jemqorlyqty qosa alǵanda, aýyr, áleýmettik qaýipti áreketter úshin jaýapkershilik kúsheitiledi.
Sondai-aq, biyldan bastap qylmystyq qýdalaý organdary túbegeili jańa jaǵdailarda jumys isteidi. Atap aitqanda, EYDU elderiniń tájiribesi boiynsha qylmystyq protsestiń úsh býyndy modeli engizildi. Jinalǵan dáleldemeler prokýror tarapynan táýelsiz baǵalanady, onyń kelisiminsiz eshqandai negizgi is júrgizý sheshiminiń zańdy kúshi bolmaidy.
Qorytyndylai kele, M.Ahmetjanov Qazaqstan sybailas jemqorlyqty onyń barlyq nysandarynda joiý baǵytyn ustanatynyn jáne barlyq múddeli taraptarmen yntymaqtastyqqa daiyn ekenin atap ótti.
BUU Bas Assambleiasynyń arnaiy sessiiasynyń plenarlyq otyrystarynda BUU-nyń Sybailas jemqorlyqqa qarsy konventsiiasyna múshe memleketter men ÚEU ókilderiniń, sondai-aq bas Assambleiadaǵy baqylaýshylardyń baiandama jasaidy.
Is-shara qorytyndysy boiynsha naqty is-qimylǵa baǵdarlanǵan saiasi deklaratsiiany qabyldaý josparlanyp otyr. Atalǵan qujattyń jobasynda sybailas jemqorlyqqa qarsy is-qimyldyń keshendi tásilin qamtamasyz etýge, halyqaralyq qoǵamdastyqtyń birlesken kúsh-jigerin qabyldaýǵa jáne parasattylyqty, ashyqtyq pen eseptilikti ilgeriletýge erekshe nazar aýdarylǵan.
Is-shara 2-4 maýsym aralyǵynda Niý-Iork qalasynda (AQSh) onlain formatta ótti.
