Foto: Aijan Esimova oń jaqta, harpersbazaar.kz
Forbes Kazahstan basylymy qazaqstandyq oligarhtar tizimin jańartty. 75 bai kásipkerdiń arasynda 5 áiel bar, dep habarlaidy «Ult aqparat» Stan.kz-ke silteme jasap.
Qazaqstannyń eń bai biznesmenderiniń jyl saiynǵy reitingi jariialandy. Bul joly elimizdegi 50 aýqatty adamnyń tizimi taǵy 25 kásipkerdiń esimimen tolyqty.
Keiingi eki jylda Qazaqstandaǵy iri kásipkerlik aitarlyqtai qarqyn alǵan.
Tizimdegilerdiń jalpy bailyǵy ótken jylmen salystyrǵanda 8,2 milliard dollar ósip, 46,63 milliard dollarǵa jetti. Byltyrǵy 769 million dollarmen salystyrǵanda ortasha kórsetkish, boljam boiynsha, 622 million dollarǵa deiin tómendedi.
Aita keteiik, eń bai 75 qazaqstandyqtyń arasynda 5 áiel bar. Olar: Dinara Qulybaeva, Dariǵa Nazarbaeva, Raýshan Saǵdieva, Aijan Esimova jáne Gaýhar Qapparova.
Aijan Esimova tizimde 44-orynǵa jaiǵasty. Onyń dáýleti 207 million dollarǵa baǵalandy. Kásipkerdiń bailyǵynyń basym bóligin 2021 jyly britaniialyq Kazphosphate Limited kompaniiasy arqyly Ǵalymjan Esenovpen birge (№15 reiting) aktsioneri bolǵan "Qazfosfat" JShS-in satýdan túsken qarjy quraidy.
Sondai-aq onyń "Sport Tsentr" JShS (KRIDA fitnes-klýb) jáne Petropavl nan-toqash zaýytynda aktsiialary bar.
Aijan Esimova Forbes reitinginde 15-orynda turǵan kásipker Ǵalymjan Esenovpen turmysta bolǵan. Onyń bailyǵy 590 million dollarǵa baǵalandy. Kásipker "First Heartland Securities" AQ-nyń 99,74%-yna ielik etý arqyly ol "First Heartland Jusan Bank" AQ-nyń 79,63%-yn baqylaidy, sondai-aq banktiń taǵy 20,11%-y tikelei Ǵalymjan Esenovke tiesili. Kásipkerdiń Jusan Bank arqyly "Qazaqtelekomda" AQ – 9,19% – jáne "Ksellde" AQ – 9,08% (taǵy 14,87% – jeke ózi) aktsiialary bar.
Aijan Esimova – Ahmetjan Esimovtiń qyzy. 2017-2021 jyldar aralyǵynda Ahmetjan Esimov "Samuryq-Qazyna" qorynyń basqarma basshysy qyzmetin atqarǵan. Sodan keiin ol Qazaqstannyń burynǵy prezidentiniń shtattan tys kómekshisi bolyp taǵaiyndaldy.
Buǵan deiin alty qazaqstandyq álemdegi eń bai adamdardyń tizimine engen edi.
