Astanada Ahmet Baitursynulynyń 150 jyldyǵyna arnalǵan halyqaralyq ǵylymi-praktikalyq konferentsiia bastaldy, dep habarlaidy QazAqparat.
Shara QR Memlekettik hatshysy Erlan Qarinniń baiandamasymen bastaldy.
«Halqymyz óziniń tarihynda erekshe oryny bar eki tulǵany «Ult ustazy» dep ardaqtaǵan. Aldymen, árine, uly Abaidy aitamyz. Odan keiin Ahmet Baitursynulynyń esimi atalady. Alash kósemi, qazaqtyń birtýar perzenti Ahmet Baitursynulynyń týǵanyna biyl 150 jyl tolyp otyr. Bul mereitoidy IýNESKO deńgeiinde atap ótemiz. Táýelsizdik ultymyzdyń jadyn jańǵyrtyp, tarihi tamyrymyzdan qaitadan nár alýymyzǵa jol ashty. Bul rette ult ustazynyń eńbegin zerdelep, ony mol murasyn urpaq sanasyna sińirý barshamyzǵa ortaq mindet. Árine, áleýmettik jelide búgin álemde bolyp jatqan, bárimiz baiqap jatqan dúrbeleń oqiǵalar kezinde osyndai shara ótkizýdiń qandai mańyzy bar dep jatqandar bar. Biraq qandai oqiǵalar oryn alsa da, biz ózimizdiń ulttyq kún tártibimizden aýytqymaýymyz kerek», - dedi Memlekettik hatshy.
Onyń paiymynsha, Ahmet Baitursynulynyń 150 jyldyǵy ulttyq kún tártibinde turǵan ult rýhaniiaty úshin úlken bir mańyzdy taqyryptardyń biri.
«Osydan týra bir ǵasyr buryn jurtymyz ult ziialylarynyń bastamasymen Ahańnyń 50 jyldyǵyn atap ótkenin barshańyz jaqsy bilesizder. Sodan beri týra bir ǵasyr ótip otyr. Bir ǵasyrdan keiin de Ahań taǵy da ultty uiystyryp, ult ziialylaryn bir jerge jinap otyr. Bul da urpaqtar sabaqtastyǵynyń bir belgisi. Búgin mine Ahań ańsaǵan táýelsiz eldiń urpaqtary onyń 150 jyldyq mereitoiynda bas qosyp otyr», - dedi Erlan Qarin.
Q.Qýanyshbaev atyndaǵy memlekettik akademiialyq qazaq mýzykalyq-drama teatrynda ótip jatqan konferentsiiaǵa laýazymdy memlekettik qyzmetkeler, alys-jaqyn shet memleketterdiń ǵalymdary, alashtanýshylar, ahmettanýshylar, ádebietshi ǵalymdar, tarihshylar, ziialy qaýym ókilderi, depýtattar qatysyp otyr. Sharada M. Qoigeldiev, Sh. Qurmanbaiuly, D. Qamzabekuly, A. Fazyljanova, J. Smaǵulov, Ó. Ábdimanuly, A. Ismaqova, J. Jaqypov, Sh.Jalmahanov, A. Salqynbai, O. Jubaeva, Q. Kúderinova, B. Momynova, U. Erkinbai, T. Aitova, M. Ermuhamet, T. Shanbai, S. Aqqululy, R. Imahanbet, Q. Saq, A. Ábsadyq, E.Tileshov pen A. Qydyrshaev jáne t.b. zertteýshiler baiandama oqidy.
Sondai-aq «Ahmet Baitursynuly jáne qazaq filologiiasynyń máseleleri», «Ahmet Baitursynuly jáne qoǵamdyq-gýmanitarlyq ǵylymdar» atty sektsiialyq otyrystar bolady.
Konferentsiiadan keiin saǵat 18.00-de Erkeǵali Rahmadiev atyndaǵy memlekettik akademiialyq filormoniiada «Ult ustazy» atty ádebi-sazdy kesh ótedi.
