Qazaqstan Prezidenti «Astana» halyqaralyq qarjy ortalyǵyn basqarý jónindegi Keńes otyrysyn ótkizdi, dep habarlaidy "Ult aqparat" Aqordaǵa silteme jasap.
Otyrysqa Keńes tóraǵasy – QR Premer-Ministri Asqar Mamin, QR Qarjy ministri Álihan Smaiylov, Ulttyq ekonomika ministri Rýslan Dálenov, Ulttyq bank tóraǵasy Erbolat Dosaev, AHQO Basqarýshysy Qairat Kelimbetov, sondai-aq Keńes músheleri: Eýropalyq qaita qurý jáne damý bankiniń prezidenti Sýma Chakrabarti, JP Morgan Chase International Direktorlar keńesiniń tóraǵasy Djeikob Frenkel, Resei Sberbankiniń prezidenti jáne basqarma tóraǵasy German Gref, Islam damý banki tobynyń prezidenti Bandar Hadjar, «Iandeks» kompaniialar tobynyń basshysy jáne negizin qalaýshylardyń biri Arkadii Voloj, Citigroup investitsiialyq jáne korporativtik bankiniń úkimetter men memlekettik sektor jónindegi jahandyq blogynyń basshysy Djýli Monako.
Qasym-Jomart Toqaev óz sózinde Keńestiń jańa múshelerine rizashylyǵyn bildirip, sheteldik investorlardyń kúsh-jigeri men qoldaýynyń arqasynda «Astana» halyqaralyq qarjy ortalyǵynyń (AHQO) aldaǵy jumysyna negiz qalanǵanyn atap ótti.
– Resmi túrde iske qosylǵannan beri bir jyl ishinde Halyqaralyq qarjy ortalyǵy bedeldi qarjy ortalyqtarynyń jahandyq indeksi boiynsha 37 pozitsiiaǵa kóterilip, 51-shi orynǵa ie boldy. AHQO tabysty jumys isteýi úshin barlyq jaǵdai jasalǵan, qajetti infraqurylym bar. Endi bizge naqty nátijelerge qol jetkizý kerek, – dedi Memleket basshysy.
Qasym-Jomart Toqaev Nur-Sultan qalasy álemge tanymal halyqaralyq qarjy ortalyǵyna ainalyp kele jatqanyn atap ótti.
– Álemniń jetekshi sáýletshileri elordanyń biregei beinesin jasady. Endi dúniejúziniń belgili qarjygerleri osy jerde tabysty qarjy ortalyǵyn qalyptastyrýǵa atsalysatyn kez keldi. Ortalyq qarjy sektoryn damytýmen qatar, ekonomikaǵa investitsiialar tartýy tiis. AHQO bazasynda keleshegi zor jobalardy qarjylandyrý jónindegi negizgi mámileler jasalýy qajet. Bul jerde «Qazaqtelekom», «Qazmunaigaz», QTJ, «Eir Astana» syndy ulttyq kompaniialardyń IPO-sy ótedi, – dep atap ótti Qazaqstan Prezidenti.
Otyrys barysynda AHQO-nyń jyldyq esebi boiynsha resmi tanystyrylymy ótti.
