Qazaqstan Prezidenti «Astana» halyqaralyq qarjy ortalyǵynyń birjasyndaǵy alǵashqy saýda-sattyqty bastaý rásimine qatysty, dep habarlaidy "Ult aqparat" Aqordaǵa silteme jasap.
Memleket basshysy is-sharada sóilegen sózinde «Astana» halyqaralyq qarjy ortalyǵynyń birjasyndaǵy alǵashqy saýda-sattyqty bastaý rásiminiń ulttyq valiýtamyz – teńgeniń 25 jyldyq mereitoiy qarsańynda ótýiniń simvoldyq máni zor ekenin aitty.
Nursultan Nazarbaev tól teńgemizdi engizý óz qarjy júiemizdi qalyptastyryp, memleketimizdiń ekonomikalyq derbestigin qamtamasyz etýge múmkindik bergenin atap ótti.
– Sodan beri Qazaqstan ekonomikasy edáýir ósip, halyqtyń turmys deńgeii de artty. Aýqymdy reformalar júrgizilip jatyr. «Astana» halyqaralyq qarjy ortalyǵynyń iske qosylýy – elimizdi odan ári ornyqty damytýdyń mańyzdy qadamy, – dedi Elbasy.
Qazaqstan Prezidenti rásimge qatysýshylarǵa álemdik ýran naryǵynyń 20 paiyzǵa jýyǵyn qamtityn «Qazatomónerkásip» ulttyq kompaniiasy búgin IRO-ǵa alǵash ret shyǵyp otyrǵanyn aitty.
– Keleshekte biz «Qazaqtelekom», «Eir Astana», «Qazmunaigaz» jáne ózge de ulttyq kompaniialardyń aktivterin satylymǵa shyǵarýdy josparlap otyrmyz. «Astana» halyqaralyq qarjy ortalyǵy elimizge shet elderdiń kapitalyn tartýdyń quralyna ainalyp, qor naryǵyn damýdyń jańa deńgeiine shyǵarýǵa tiis. Munda álemniń úzdik tájiribeleri jappai qoldanylyp, tájiribeli seriktester men sarapshylar tartylǵan, sondai-aq onyń jumysyna qatysýshylar úshin teńdessiz jaǵdailar jasalǵan, – dedi Memleket basshysy.
Nursultan Nazarbaev keleshekte «Astana» halyqaralyq qarjy ortalyǵy óńirdiń basty qarjy habyna ainalyp, Aziianyń úzdik qarjy ortalyqtarynyń qataryna qosylýǵa tiis ekenin atap ótti.
– Qarjy ortalyǵy qazirdiń ózinde elordamyzǵa «qarjy astanasy» degen jańa mártebe berdi. Jahandyq qarjy ortalyqtarynyń reitinginde bas qalamyz tek sońǵy jyldyń ózinde 27 satyǵa kóterildi. Astana turǵyndar men elorda qonaqtary úshin meilinshe qolaily jaǵdai jasalatyn «aqyldy qala» retinde odan ári dami beredi, – dedi Elbasy.
Sońynda Qazaqstan Prezidenti memleketimizdiń barlyq bastamalary halqymyzdyń ál-aýqaty men elimizdiń jahandyq básekege qabilettiligin arttyrýǵa baǵyttalǵanyn aitty.
