Jambyl oblysynda 15 jastaǵy jasóspirim ákesiniń kóligin ruqsatsyz aidap ketip, jol apatyna tústi. Saldarynan bir adam qaza bolǵan, - dep habarlaidy Tengrinews.kz agenttigi oblystyq Politsiia departamentiniń baspasóz qyzmetine silteme jasap.
Vedomstvo málimetinshe, jantúrshigerlik jol apaty 1 qarashada saǵat 21:30-da "Taraz-Aisha bibi" avtojolynyń 1-shaqyrymynda bolǵan.
15 jastaǵy jasóspirim Aisha bibi aýylynan Taraz qalasy baǵytyna kele jatyp, kólikti basqara almai joldyń qarsy jolaǵyna shyǵyp ketip, aǵashqa soǵylǵan.
Júrgizýshiden basqa kólikte taǵy úsh jasóspirim bolǵan.
"Jol apaty saldarynan 14 jastaǵy jolaýshy alǵan dene jaraqatynan oqiǵa ornynda qaza boldy. Júrgizýshi jáne ártúrli dene jaraqatyn alǵan eki jasóspirim oblystyq balalar aýrýhanasyna jetkizildi. Osy derekke qatysty Qylmystyq kodekstiń 345-baby 3-bóligimen sotaldy tergeý amaldary bastaldy", - delingen habarlamada.
Birqatar qajet saraptamalar taǵaiyndaldy. Sondai-aq, jasóspirimniń ata-ana ruqsatynsyz ákesine tiesili kóliktiń kiltin alǵany anyqtaldy.
