Qazaqstan Prezidenti Qasym-Jomart Toqaev Rjev túbindegi qandy shaiqasta kóz jumǵan Qasym kókesi (ákesiniń aǵasy) týraly aityp berdi, dep habarlaidy QazAqparat.
«Ákemniń úlken aǵasy Rjev shaiqasynda qaitys boldy. Ol jerde ózderińiz biletindei, Ekinshi dúniejúzlik soǵystyń eń qandy shaiqastarynyń biri bolǵan edi. Meniń aǵam Tver oblysy Rjevskii aýdany Trýbino aýylyndaǵy maidangerlerdiń ziratynda jerlendi. Aleksandr Tvardovskiidiń: «Men Rjevtiń túbinde óldim, baqytty bolýdy sizderge buiyryp, Otanǵa adal bolýdy tapsyrdym, óliler ketse de, ketken joq kúiinip, bizde bir uly baqyt bar - Otan úshin quladyq, ony biz qutqarý úshin qiyldyq» degen óleńi esterińizde bolar», - dedi Prezident «MIR» arnasyna bergen suhbatynda.
Memleket basshysy ákesin de, kókesi Qasymdy da otbasy bolyp eske alatynyn, beibit ómir úshin maidanda máńgi qalǵan batyrlardyń bári umytylmaitynyn aityp ótti.
«Meniń esimim de sol Qasym kókemniń qurmetine qoiylǵan. Meniń ákem orny tolmas qazasyna qabyrǵasy qaiysyp, úlken aǵasynyń rýhyna qurmet kórsetti. Ákem ony qatty saǵyndy, barlyq hattar men fotolardy saqtap, ómir boiy jerlengen jeri týraly kez-kelgen aqparatty tabýǵa tyrysty. Keide ákem aǵasynyń qaita tirilip keletininen de úmittenetin siiaqty kórinetin maǵan», - dep qosty Memleket basshysy.
Alaida Prezidenttiń aitýynsha, Rjev túbindegi shaiqasqa qatysty qujattar da qupiia saqtalǵan.
«Reseidiń Qorǵanys ministrliginiń Podolskidegi muraǵaty 2000 jyldyń ortasynda ashylǵan kezde ǵana biz onyń jerlengen jerin bildik. Men Almatydaǵy ákemniń qabirinen topyraq alyp, Trýbino aýylyndaǵy qabirge bardym. Ulym menimen birge boldy. Mine, sol baýyrlastar qabirine ákemniń qabirinen ákelingen topyraqty septim. Sodan keiin men aǵamnyń qabirinen topyraqty Almatyǵa apardym», - dedi Prezident.
