Oralda kúieý balasy atyp tastaǵan 60 jastaǵy ájeidiń qyzy Nadiia Davletshina oqiǵanyń qalai bolǵanyn aityp berdi, - dep habarlaidy Tengrinews.kz "Moi gorod" portalyna silteme jasap.
Onyń sózinshe, áiel burynǵy kúieýi Rýstam Ábdirahmanovpen segiz jyldan beri turmaidy.
"Birge turmaimyz, tatý-tátti aiyrylystyq. Úilengennen keiin bir jyl óte ata-anammen Oralda tura bastadym. Rýstam Aqsaida anasymen qalǵan. Ildar atty ulymyz bar, segizge toldy. Aralaryna túsken joqpyn, demalysta únemi alyp ketetin. Biraq sońǵy ret demalystan keiin ulymyzdy urlap áketken, úsh apta qaitara almai júrdik. Buǵan mektepte oǵan báribir eshteńe úiretpeidi degen syltaý aitty", - deidi Nadiia.
Áieldiń sózinshe, mundai bolatynyn ol múlde kútpegen.
"Ádettegidei úige jinaldyq. Úige bireý kelip, anam esikti ashýǵa ketken. Aýzyn ashyp úlgergen joq, oq atyldy. Esikke júgirip bardyq, anam qansyrap jatty. Burynǵy kúieýim bolsa myltyqty ákeme buryp, taǵy atty. Ulymdy alyp dárethanaǵa jasyryndyq. Úreiim qashty, sálden soń syrtqa qaraǵanymda ákemniń ishi aqtarylyp jatqanyn kórdim. Soǵan qaramastan, esikti jaýyp úlgeripti. Jedel járdem men politsiia shaqyrdym. Ulym qalshyldap ketti, bári kóz aldynda boldy ǵoi. Kórshilerim aitady, burynǵy kúieýim oq atqan soń myltyqty qoiyp, bireýmen telefon arqyly sóilesip ketip qalǵan. Ulymyzǵa kelgen dep oilaimyz. Ol tastap ketken sómkede balanyń kiimderi men pyshaq tabyldy. Nege olai etkenin bilmeimin, keshe sotta bizdi resmi túrde ajyrastyrǵan. Biraq bul eki jaqtyń kelisimimen boldy ǵoi. Alaida ol sot otyrysyna kelmegen bolatyn", - dep jylady áiel.
Nadiianyń aitýynsha, biraz ýaqyttan keiin politsiia onyń burynǵy kúieýin ustaǵan. Er adam esh jerde jumys istemegen jáne múgedektigine bailanysty tirkeýde bolǵan.
"Bostandyqqa eshqashan shyqpaityndai, barynsha qatal jazalanǵanyn qalaimyn", - deidi ol.
Eske salaiyq, 10 mamyrda Oraldaǵy Stroitel yqshamaýdanyda er adam enesi men qaiyn atasyn atyp tastaǵan. Egde áiel oqiǵa ornynda kóz jumdy. Jaraqat alǵan qariia aýrýhanaǵa jetkizildi. Oǵan alty saǵatqa sozylǵan ota jasaldy. Qazir onyń jaǵdaiy aýyr.
