Qazaqstandyq ánshi Zattybek Kópbosynuly áleýmettik jelidegi paraqshasynda ómirden ótken ákesin eske alyp, oqyrmandaryn tolqytqan jazba jariialady, dep habarlaidy ult.kz.
Óner iesi ákesiniń dúnieden ozǵanyna bir jyl tolǵanyn aityp, oǵan degen saǵynyshyn jetkizdi. Sondai-aq anasynyń ómirden ótkenine 25 jyl bolǵanyn eske alyp, qos ata-anasynyń rýhyna arnap qara shańyraqta as berilip, quran baǵyshtalǵanyn habarlady.
«Áke, siz ketkeli bir jyldyń júzi bolypty. Anamnyń ómirden ótkenine 25 jyl ótti. Ekeýińiz de máńgilik saǵynyshyma ainaldyńyzdar. Búgin qara shańyraqta ózderińizge arnap as berip, quran baǵyshtap jatyrmyz. Aǵaiyn-týys, quda-jekjat pen sizderdiń kózderińizdi kórip, batalaryńyzdy alǵan jandardyń bárin jinadyq», – dep jazdy ánshi.
Jazba sońynda Zattybek Kópbosynuly ata-anasynyń jandary jánnatta qaýyshqanyna senetinin aityp, olardyń rýhyna Alladan raqym tiledi. Áserli jazbaǵa jeli qoldanýshylary da pikir qaldyryp, ánshige kóńil aityp, ata-anasyna duǵa baǵyshtady.
