Foto: Turkystan.kz
Ánshi Aqbota Kerimbekova tanymal bloger ári áýesqoi ánshi Murat Ábdildániń Respýblika saraiynda án salǵanyna shúilikti.
Ol ańyz ánshiler óner kórsetken kieli Respýblika saraiynda blogerdiń án salyp júrgenine kúiindi. Óner iesi kásibi bilim alyp, 30 jyl tynymsyz eńbek etip qana bul sahnaǵa zorǵa shyqqanyn alǵa tartty.
"Birneshe kún buryn áleýmettik jelide Murat Ábilda degen adamnyń Respýblika saraiynda án salyp turǵan videosy tarady. Oilańyzshy, Respýblika saraiynda. Elimizdiń tarihi-mádeni mańyzdy nysanynda! Qazaqtyń myńdaǵan talanty sol sahnaǵa shyǵýdy armandaǵan, myńdaǵan daryndy qazaq sol sahnaǵa shyǵa almai, armanda ketti. Ol jigit eldiń azy men tozy emes shyǵar, onyń adami keskin-kelbetine tilimdi tigize almaimyn. Bir jaǵynan qaraǵanda onyń Respýblika saraiynda án salǵany qylmys ta emes shyǵar. Biraq, aǵaiyndar-aý, Respýblika saraiynyń sahnasy - Roza Baǵlanova sekildi ańyz adamnyń mańdai terimen salynǵan, táýelsizdiktiń alǵashqy kúninen bastap ult taǵdyry sheshilgen, eń mańyzdy tarihi sheshimder qabyldanǵan, birneshe kúnnen keiin toilanǵaly turǵan Respýblika kúniniń negizi bolǵan táýelsizdik dekloratsiiasy qabyldanǵan qasietti oryn emes pe edi?
Ol sahnaǵa shyǵý úshin bizden myń ese laiyq ári talanttyraq adamdar taǵdyryn arnady ǵoi, bizdiń ózimiz mýzyka mektebinde oqyp, óner akademiiasynda kásibi daǵdymyzdy qalyptastyryp, 30 jylǵa jýyq tynymsyz eńbek etip kele jatsaq ta, tizemiz dirildep, zorǵa shyǵamyz. Ózimizge senimsizdikten emes, kishkentaiymyzdan jadymyzda qalyptasqan kieli sahnaǵa degen qurmetimizden. Jalpy aitqanda, ol sahna - memlekettiń minberi, ulttyń negizgi tribýnasy, óte mańyzdy oryn ǵoi. Endi sol ulttyq minberge shyqqysy kelgenniń bári shyǵa bere me?! Osy sheneýnikter ózderine kelgende quqyq talap etkish, ar saqtaǵysh, dál solai nege memlekettiń bas sahnasyn saqtamaidy?! Mádeniet salasynyń ary da, namysy da - sahna. Sahnaǵa shyǵarǵan adamyna, sahnada kórsetken dúniesine qarap salanyń deńgeiin kórýge bolady", - dep jazdy Kerimbekova.
Oǵan qosa óner iesi ózin Murat Ábildaǵa kórealmaýshylyq tanytyp jatyr dep synyǵandar jaýap berdi.
"Meniń jazbamnyń maqsaty - sahna ainalasyndaǵy olqylyqtardy birinshi basshyǵa tikelei jetkizý bolǵan edi, ol maqsatyna jetti. Aldaǵy ýaqytta, naqty nátijeler bolyp jatsa, ony ózim sizderge habarlap, baiandap otyratyn bolamyn. Meniń bul jazbammen bar qisyq túzelip, bar kemshilik ońala ketpes, dei turǵanmen osylai jan-jaqtan janashyrlyq tanyta bersek, halyq almaityn qamal joq! Sosyn taǵy bir aitatynym, "Murat Ábdildadan sahnany qyzǵanyp jatyrsyń ba? depti bir oqyrmandarym… Ishtei ábden kúlip alyp berer jaýabym: árkim óz ainalysyp júrgen isin, jasap júrgen jumysyn, eńbek etip jatqan ordasynyń jai-kúiine alańdaýy, onyń máselelerine bas qatyrýy kerek. Sahna - bizdiń jumys orynymyz. Men ózim onda shyǵý úshin mýzyka mektebinde oqydym, óner akademiiasynda kásibi bilim aldym, qansha syn-saraptan óttim, sóitip baryp shyqqan sahnam! Nege men oǵan bas aýyrtpaýym kerek?! Ol jerdiń jaiyn men aitpaǵanda kim aitady?! Jastardyń bári birden juldyz bolyp kete almaidy", - dep jazdy ánshi.
