Biraz ýaqyt boldy Ýisten Hiý Odendi jaǵalap oqyp júrmin. Bul tentek nemeni ádebiettanýshylar HH ǵasyrdyń uly aqyndarynyń qataryna jatqyzady. Sabazdyń tili qyrshańqy, minezi shaldýarlaý, oilary bólek. Unaidy. Unamaityn jerleri de alaida barshylyq. Unaityn jerlerin tabý úshin keide uzaq-sonar, keide kelte-sholaq óleńderin mai shammen oqý kerek bolady. Mezi qyp jiberetin tustary da joq emes. Ýisten Britaniiada týyp, keiin AQSh azamattyǵyn alǵan eken. 66 jasynda Avstriiada ólgen. Pálenbai xalyqaralyq bedeldi syilyqtar alǵan, ol bizge qyzyq emes. Kimge kerek Gýgl aǵaidan surap alar. Mańyzdysy - qyzyq aqyn.
Óleńderin aǵylshyn tilin meńgergen kezde aýdararmyn múmkin. Ázirge orys tiline aýdarylǵan keibir oilaryn qazaqshalap edim, qoldaryńyz bos bolsa, oqi salyńyzdar.
***
Men úsh uly aqyndy bilýshi edim, olardyń barlyǵy da joǵary deńgeidegi ittiń ǵana balalary bolatyn: Ieits, Frost, Breht.
***
Máskeýlikter bir birine Kremldiń únemi jaryǵy janyp turatyn terezesin nusqap: "Bul eńbekqor ara - Stalin" deitin kórinedi.
Túndeletip tek Gitlerler jumys isteidi.
***
Meniń Qudai aldyndaǵy jalǵyz mindetim - baqytty bolý, al jaqynymnyń aldyndaǵy paryzym - oǵan lázzat syilaý jáne onyń muń-qaiǵysyn jeńildetý.
***
Orys jazýshylarynyń ishindegi eń jaqsysy - Chexov. Senderdiń aralaryndaǵy jalǵyz esi durys adam sol ǵana.
***
Maǵan orystar avtokólik tereze tazalaǵyshyn únemi urlaidy dep aitty. Nege?
***
Tek áielder ǵana kúlkili oqiǵany estip alǵan soń: "Bul shynymen bolǵan ba?" dep suraidy.
***
Men saǵat tili boiynsha ómir súremin. Qolymda saǵat bolmasa, qai ýaqytta qarnym ashatynyn da bilmeidi ekem.
***
Kúrdeli suraq qoiý ma? Túk qiyn emes!
***
Óleńniń ákesi - Aqyn, sheshesi - Til.
***
Jańa poeziianyń kúrdeliligi jóninde syn aitar aldynda, adam ózinen "men qansha ret jan dúniemdi dál osylai tereń ári shynaiy aqtara aldym dep suraý kerek".
***
A, Qudai, kitap jaratqanyńyzǵa zor alǵys! Áitpese adamdardyń áńgimesinen esim baiaǵyda-aq aýyp ketýshi edi.
***
Ajal - piknikte seni qýyp jetken alystaǵy kún kúrkiriniń dybysy.
--------------------------------
Aitpaqshy, Odendi orys tilinde sóiletken Brodskii ol týraly bylai depti:
"Maǵan Odenniń beti kesirtke men tasbaqanyń terisin eske salatyn".
Keiin bir aitqan sózi:
"Eger maǵan túr tańda dese, men Odenniń nemese Bekkettiń túrin tańdap alar edim. Biraq, Odendiki durystaý ǵoi deimin".
Al, maǵan Odenniń túri aýyldaǵy bir kisiniń kelbetin eske salady. Ol da aqyn shatys bireý bolatyn.
Aqberen Elgezek
