kórneki sýret ashyq derekkózden alyndy
Májilistiń jalpy otyrysynda depýtattar UQK tóraǵasynyń orynbasary Marat Qalqabaevqa kýrsanttar men komitet qyzmetkerleri arasyndaǵy qumar oiyndarǵa qatysty másele týraly surady, - dep habarlaidy Tengrinews.kz saity.
Depýtat Magerram Magerramov bul keleńsizdik forma kigen adamdardy da ainalyp ótpegenin aityp, jaqynda Almatyda UQK akademiiasynyń kýrsanty óz-ózine qol jumsaǵanyn eske aldy.
"Jigittiń otbasyna kóńil aitamyz. UQK akademiiasyna oqýǵa túsý kezinde úmitkerler psihologiialyq testileýden, poligraftan ótedi. Osyǵan bailanysty kýrsanttardyń qumar oiyndarǵa degen táýeldiligi qadaǵalanyp jatyr ma jáne odan qalai saqtanýǵa bolady? Mundai jaǵdailar bolashaqta taǵy qaitalanbaýy úshin qandai jumystar istelip jatyr?" - dep surady depýtat UQK tóraǵasynyń orynbasaryna.
Marat Qalqabaev politsiia tergep jatqan kýrsanttyń óz-ózine qol jumsaý faktisi boiynsha qozǵalǵan qylmystyq ispen qatar UQK óziniń qyzmettik tergeýin de júrgizgenin aitty.
"Ulttyq qaýipsizdik organdaryna kireberiste úmitkerler ótirik detektorynda jan-jaqty, onyń ishinde psihologiialyq tekserýden ótetinin ózińiz de atap óttińiz. Aldaǵy ýaqytta akademiianyń qyzmetkerleri, stýdentteri baqylanatyn bolady. Bizde qaýipsizdik bólimde psihologiialyq qyzmet pen jeke quram bar. Munyń barlyǵy qazir saraptalyp, eleýli túzetýler engizildi. Munyń barlyǵy, ózińiz aitqandai, qumar oiynynyń saldary. Ol bizge de keldi. Bul - komitettiń, akademiianyń tarihyndaǵy alǵashqy jaǵdai. Lýdomaniia - qumar oiynǵa degen táýeldilik birden paida bolmaidy. Birte-birte paida bolatyny aitylady. Eń bastysy - adamnyń qumar oiynǵa kirisken sátin der kezinde anyqtaý. Mine, bizdiń basty máselemiz. Ol úshin qajetti sharalardy qabyldadyq", - dedi UQK tóraǵasynyń orynbasary.
Buǵan jaýap retinde depýtat Rýslan Berdenov arnaiy qyzmettiń bolashaq jáne qazirgi qyzmetkerleriniń qatarynda mundai jaǵdailar tolǵymen toqtatylatynyna qarsylyq bildirdi.
"Bul bir ǵana jaǵdai emes. Bul jaǵdaiǵa qatysty kishigirim esep jasap qana qoimai, úlken jumys isteseńizder durys bolady. Sebebi bul áskeri oryndardaǵy óte úlken problema. Men kúnige ártúrli hat alyp turamyn. Depýtattar retinde adamdarmen bólek kezdesip júrmiz. Bul óte kúrdeli problema. Osyny ańǵaryp, ózderińiz úshin durys baǵa qoiyńyzdar", - dedi depýtat Berdenov Májilis otyrysynda.
UQK tóraǵasy orynbasarynyń aitýynsha, olar bul máseleden habardar jáne shara qoldanyp jatyr.
"Bárin túsinip otyrmyz, bárin bilip otyrmyz. Qoldan kelgen sharanyń bárin isteimiz. Problemany bilemiz. Shuǵyl jáne jaýapty sheshimder qabyldaimyz", - deidi UQK ókili Májiliste.
Májilistegi áriptesine depýtat Aigúl Quspan da jaýap berdi.
"Biz bul máseleni de zerttedik. Bul ulttyq qaýipsizdik júiesinde birinshi ret bolyp otyr. Ókinishke qarai, mundai jaǵdailar áskerde jáne Ulttyq ulanda buryn da bolǵan", - dedi ol.
