Qazaqstannyń eńbek sińirgen qoǵam jáne saiasi qairatkeri, akademik Qalyq Abdýllaev ómirden ozdy, dep habarlaidy "Ult aqparat".
Bul týraly saiasattanýshy Erbol Edilov Telegram-kanalynda jazdy.
«1997-1999 jyldar aralyǵynda Ońtústik Qazaqstan oblysynyń ákimi bolǵan Qalyq Abdýllaev 78 jasynda ómirden ozdy. Týǵan-týystary men jaqyndaryna qazaǵa bailanysty qaiǵyryp kóńil aitamyz. Imandy bolsyn!», - dep jazdy ol.
Qalyq Abdýllaev 1942 jyly 28 maýsymda Ońtústik Qazaqstan oblysy, Lengir aýdany, Qasqasý aýylynda dúniege kelgen. 1963 jyly Tashkent politehnikalyq institýtyn injener-elektrik mamandyǵy boiynsha oqyǵan.
1981 jyly «Qurmet Belgisi» ordenimen marapattalǵan. Qalyq Abdýllaev Shymkent qalalyq, Ońtústik Qazaqstan oblystyq Halyq depýtattary keńesiniń, Qazaq KSR Joǵarǵy Keńesiniń depýtaty bolǵan.
Eńbek jolyn «Ońtústikqazenergonyń» aýdandyq basqarmasyndaǵy injener qyzmetinen bastaǵan.
1969 jyly Respýblika energetika ministrliginiń apparatyna jańadan uiymdastyrylǵan dispetcherlik birlestik basqarmasyna energetikalyq tártip qyzmetiniń bastyǵy bolyp jiberilgen. 1974 jyly «Ońtústikqazenergo» aimaqtyq basqarmasyna bas injener, keiin basqarma bastyǵy qyzmetin atqarǵan.
1982 jyly Qazaq KSR Energetika ministriniń birinshi orynbasary qyzmetine taǵaiyndaldy.
1986-1992 jyldar aralyǵynda Qazaq KSR Ministrler Keńesi tóraǵasynyń orynbasary, Respýblika Memlekettik josparlaý komitetiniń tóraǵasy, Qazaq KSR Ministrler Keńesi tóraǵasynyń birinshi orynbasary, Respýblika Memlekettik josparlaý komitetiniń tóraǵasy, Premer-Ministrdiń orynbasary - Qazaq KSR Memlekettik ekonomikalyq komitetiniń tóraǵasy qyzmetterin atqardy.
Osy jyldary ol QR Premer-Ministriniń orynbasary - Sheteldik investitsiialar jónindegi ulttyq Agenttik tóraǵasy laýazymynda Qazaqstanǵa shetelderden investitsiialar tartýdyń alǵashqy tájiribeleriniń negizin qalady.
1992 jyldan 1995 jylǵa deiin Qazaqstandyq isker yntymaqtastyq ortalyǵy «Atakent» aktsionerlik qoǵamy basqarmasynyń tóraǵasy boldy. 1995 jyly Qalyq Abdýllaevtyń iskerlik mol tájiribesi eskerilip Respýblika Prezidentiniń arnaiy jarlyǵymen qurylǵan TMD elderimen yntymaqtastyq jónindegi Memlekettik komitettiń tóraǵasy bolyp taǵaiyndaldy.
1996-1997 jyldary QR Prezidentiniń keńesshisi qyzmetin atqardy.
1997-1999 jyldary Ońtústik Qazaqstan oblysynyń ákimi, al 2000 jyldan beri ózi qurǵan «Atakent» aktsionerlik qoǵamy Direktorlar Keńesiniń tóraǵasy bolyp eńbek etti.
