«Aq jol» demokratiialyq partiiasy prezident sailaýyna Memleket basshysy Qasym-Jomart Toqaevtyń kandidatýrasyn qoldady, dep habarlaidy QazAqparat.
Partiianyń kezekten tys HIH sezinde prezident sailaýyna úmitker bolýǵa jetisýlyq jýrnalist Sandýǵash Dúisenova, Májilis depýtaty Serik Erýbaev jáne «Aq jol» QDP Aqtóbe oblystyq filialynyń tóraǵasy, kásipker Asqar Sadyqov niet bildirgen edi. Sonymen birge partiia músheleri qazirgi Prezident Qasym-Jomart Toqaevtyń da kandidatýrasyn qoldaýdy usynǵan.
Jasyryn daýys berý úshin 126 biýlleten qoldanyldy. Birinshi úmitker jýrnalist Sandýǵash Dúisenova 11 daýys jinap, 6 paiyzdy ielense, depýtat Serik Erýbaev 23 daýyspen 19 paiyzǵa ie boldy.
Al partiianyń Aqtóbe oblystyq filialynyń tóraǵasy Asqar Sadyqov 17 daýyspen 13,7 paiyz alsa, Memleket basshysy Qasym-Jomart Toqaevtyń kandidatýrasyn 74 adam, iaǵni qatysýshylardyń 64,1 paiyzy qoldaǵan.
«Qazir bizdiń elimiz áleýmettik-ekonomikalyq jaǵdai bolsyn, ishki saiasaty, syrtqy saiasaty bolsyn, tar jol, taiǵaq keshýden ótip jatyr. Áleýmettik-ekonomikalyq jaǵyna kelsek, sońǵy kezderi Prezident Q. Toqaev qabyldaǵan sheshimderge túrli pikir aitylsa da, olardyń kópshiligi naryqtyq ekonomikaǵa arnalǵan, memlekettiń ekonomikaǵa qatysýyn azaitýǵa, jeke kásipkerlikti qoldaýǵa arnalǵan. Iaǵni, bul usynystar negizinen «Aq jol» partiiasynyń kózqarasyna jaqyn», - dedi Azat Perýashev partiia sezinen keiin tilshilerge bergen suhbatynda.
Partiia tóraǵasy syrtqy saiasatta túrli syn-qaterler bar ekenin, odan elimizdi saqtap ótkizý kerektigin aitty.
«Menińshe, syrtqy saiasattaǵy eń ótkir, eń qaterli másele – táýelsizdigimizdi, memlekettigimizdi, jer tutastyǵyn saqtaý bolyp otyr. Eger osylardy saqtap qalsaq, Qazaqstan erteli-kesh myqty, damyǵan, zamanaýi naryqtyq ekonomikasy bar, demokratiiasy bar memleketke ainalady. Ol úshin qazir tańdaǵan jolymyzdan taimaýymyz kerek. Ishki saiasatty qarasaq, partiianyń úsh jyl burynǵy saiasi baǵdarlamasynda biz parlamenttik respýblika qalaitynymyzdy aittyq. Al Prezidenttiń Joldaýlary men referendýmda konstitýtsiialyq reformanyń eń basty mańyzy – parlamentarizm institýtyn kúsheitý dep jazylǵan. Iaǵni bul jerde de partiianyń kózqarasy Prezidentpen úndes bolyp jatyr», - dep túsindirdi Perýashev.
