Azat Perýashev aimaqtar men qalalardaǵy kóshe, mekeme ataýlaryna 750 Alash qairatkerleriniń esimderin berýdi usyndy.
«Aq jol» partiiasynyń pikirinshe, Táýelsizdigimizdiń 27 jylynan keiin memleket aldynda otarsyzdaný, iaǵni de-kommýnizatsiia, de-sovetizatsiia maqsattaryn ulttyq kún tártibine qoiatyn ýaqyt keldi.
Hatta «Mysaly, «aqjoldyq» depýtattardyń saýalyna berilgen resmi aqparat boiynsha el aýqymynda Lenin (506 kóshe), Kirov (54 kóshe), Marks (40 kóshe), Krýpskaia (28 kóshe), Sverdlov (24 kóshe), Engels (23 kóshe) atyndaǵy kósheler, mekemeler men aimaqtyq ataýlardyń tapjylmaǵan kúii turǵany túsiniksiz», - dep málimdeidi.
Sol sebepti «Aq jol» ákimderden aimaqtar men qalalardaǵy kóshe, mekeme ataýlaryna elimizdiń taǵdyryna esh qatysy joq adamdardyń ornyna, birinshi kezekte ult táýelsizdigi jolynda janyn pida etken Alashtyń kórnekti qairatkerleriniń esimderin berýdi usynyp otyr.
Azat Perýashev elimizdiń qalalar men eldi mekenderindegi kóshe, mekeme ataýlaryna 750-ge jýyq Alash qairatkerleriniń esimderin berýdi usyndy. Bul jóninde oblystar jáne respýblikalyq mańyzy bar qalalar ákimderiniń atyna tiisti hat joldandy.
Atalǵan 750-dei arystyń tizimi jasalyp, tipti, olardyń qai óńirde dúniege kelgeni, qandai qyzmet atqarǵany da anyqtaldy. Bul jinaqtalǵan tizim ákimderge jiberildi.
«Alash arystaryn ulyqtaý – eshbir basqa etnosqa qarsy baǵyttalǵan bastama emes. Kerisinshe, bizdiń oiymyzsha, Alash muraty búkil qazaqstandyqtardy biriktirip, elimizdiń naǵyz ulttyq ideiasyna ainalýy tiis», - delingen resmi hatta.
