«Aq jol» partiiasynyń plenýmy prezidenttik sailaýǵa partiia atynan túsetin úmitkerler boiynsha naqty bir sheshimge kele almady. Bul týraly partiianyń baspasóz qyzmeti habarlady.
Túrkistan, Mańǵystaý, Almaty oblystarynyń, Almaty jáne Nur-Sultan qalalarynyń ókilderi partiianyń tóraǵasyn usyndy. Alaida, Perýashev áriptesterinen tek qana onyń kandidatýrasymen shektelmei, ózge úmitkerlerge múmkindik berýin surady. «Partiia liderleriniń tizimin keńeitý qajet» ekenin aityp, onyń tek bir adammen shektelmeýi tiis ekenin atap ótti. Ol sailaýǵa túsip óz múmkindigin synap kórmekshi bolǵan birneshe partiialastarymen aqyldasqanyn habarlady. Biraq olardyń aty-jónin atamady.
Perýashev óz sheshimin basqa úmitkerler anyqtalǵannan keiin qabyldaitynyn aitty.
Partiia tóraǵasy óz ustanymyn bildirgennen keiin, Soltústik Qazaqstan oblysy advokattar palatasynyń tóraǵasy, Petropavl qalasyndaǵy orys drama teatryna arnalǵan «Alash» pesasynyń avtory Evgenii Kintsel óziniń kandidatýrasyn usyndy. Sondai-aq, «Aq jol» partiiasy Jambyl oblystyq filialynyń tóraǵasy, Taraz qalasynyń úsh márte máslihat depýtaty, belgili kásipker, jergilikti «Atameken» palatasyn basqarǵan Asan Qoshmambetov te nietti ekenin jetkizdi.
Depýtat Qoshmambetovtiń óz pikiri bar ekeniń halyq jaqsy biledi. Ásirese, onyń máslihattyń kópshiligine qarsy shyǵyp, burynǵy sheneýnikterge emes, áleýmettik jaǵdaiy tómen otbasylarǵa kómek berýdi usynǵany jóninde respýblikalyq BAQ-ta jariialanǵan bolatyn.
Belgili jýrnalist Arman Sqabyluly Perýashev ózdiginen bas tartqan jaǵdaida partiia jańa demokratiialyq dástúrdi qalyptastyrý maqsatynda áiel adamdy úmitkerlikke usynýy qajet degen oiyn bildirdi. Bul usynys áriptesterdiń arasynda ótkir pikirtalas týǵyzdy.
Nátijesinde, úsh saǵatqa ulasqan daýdan keiin, pleným kandidattar boiynsha naqty bir sheshimge kele almady. Ázirge belgili bolǵany, úmitkerlerdiń arasynda Kintsel men Qoshmambetovten basqa, kásipkerler, adam quqyǵy jónindegi táýelsiz sarapshy men jýrnalist te bar.
