«اق جول» پارتيياسىنىڭ پلەنۋمى پرەزيدەنتتٸك سايلاۋعا پارتييا اتىنان تٷسەتٸن ٷمٸتكەرلەر بويىنشا ناقتى بٸر شەشٸمگە كەلە المادى. بۇل تۋرالى پارتييانىڭ باسپاسٶز قىزمەتٸ حابارلادى.
تٷركٸستان, ماڭعىستاۋ, الماتى وبلىستارىنىڭ, الماتى جەنە نۇر-سۇلتان قالالارىنىڭ ٶكٸلدەرٸ پارتييانىڭ تٶراعاسىن ۇسىندى. الايدا, پەرۋاشەۆ ەرٸپتەستەرٸنەن تەك قانا ونىڭ كانديداتۋراسىمەن شەكتەلمەي, ٶزگە ٷمٸتكەرلەرگە مٷمكٸندٸك بەرۋٸن سۇرادى. «پارتييا ليدەرلەرٸنٸڭ تٸزٸمٸن كەڭەيتۋ قاجەت» ەكەنٸن ايتىپ, ونىڭ تەك بٸر اداممەن شەكتەلمەۋٸ تيٸس ەكەنٸن اتاپ ٶتتٸ. ول سايلاۋعا تٷسٸپ ٶز مٷمكٸندٸگٸن سىناپ كٶرمەكشٸ بولعان بٸرنەشە پارتييالاستارىمەن اقىلداسقانىن حابارلادى. بٸراق ولاردىڭ اتى-جٶنٸن اتامادى.
پەرۋاشەۆ ٶز شەشٸمٸن باسقا ٷمٸتكەرلەر انىقتالعاننان كەيٸن قابىلدايتىنىن ايتتى.
پارتييا تٶراعاسى ٶز ۇستانىمىن بٸلدٸرگەننەن كەيٸن, سولتٷستٸك قازاقستان وبلىسى ادۆوكاتتار پالاتاسىنىڭ تٶراعاسى, پەتروپاۆل قالاسىنداعى ورىس دراما تەاترىنا ارنالعان «الاش» پەساسىنىڭ اۆتورى ەۆگەنيي كينتسەل ٶزٸنٸڭ كانديداتۋراسىن ۇسىندى. سونداي-اق, «اق جول» پارتيياسى جامبىل وبلىستىق فيليالىنىڭ تٶراعاسى, تاراز قالاسىنىڭ ٷش مەرتە مەسليحات دەپۋتاتى, بەلگٸلٸ كەسٸپكەر, جەرگٸلٸكتٸ «اتامەكەن» پالاتاسىن باسقارعان اسان قوشمامبەتوۆ تە نيەتتٸ ەكەنٸن جەتكٸزدٸ.
دەپۋتات قوشمامبەتوۆتٸڭ ٶز پٸكٸرٸ بار ەكەنٸڭ حالىق جاقسى بٸلەدٸ. ەسٸرەسە, ونىڭ مەسليحاتتىڭ كٶپشٸلٸگٸنە قارسى شىعىپ, بۇرىنعى شەنەۋنٸكتەرگە ەمەس, ەلەۋمەتتٸك جاعدايى تٶمەن وتباسىلارعا كٶمەك بەرۋدٸ ۇسىنعانى جٶنٸندە رەسپۋبليكالىق باق-تا جارييالانعان بولاتىن.
بەلگٸلٸ جۋرناليست ارمان سقابىلۇلى پەرۋاشەۆ ٶزدٸگٸنەن باس تارتقان جاعدايدا پارتييا جاڭا دەموكراتييالىق دەستٷردٸ قالىپتاستىرۋ ماقساتىندا ەيەل ادامدى ٷمٸتكەرلٸككە ۇسىنۋى قاجەت دەگەن ويىن بٸلدٸردٸ. بۇل ۇسىنىس ەرٸپتەستەردٸڭ اراسىندا ٶتكٸر پٸكٸرتالاس تۋعىزدى.
نەتيجەسٸندە, ٷش ساعاتقا ۇلاسقان داۋدان كەيٸن, پلەنۋم كانديداتتار بويىنشا ناقتى بٸر شەشٸمگە كەلە المادى. ەزٸرگە بەلگٸلٸ بولعانى, ٷمٸتكەرلەردٸڭ اراسىندا كينتسەل مەن قوشمامبەتوۆتەن باسقا, كەسٸپكەرلەر, ادام قۇقىعى جٶنٸندەگٸ تەۋەلسٸز ساراپشى مەن جۋرناليست تە بار.
