Búgin oblystyq qazaq drama teatrynda aqyn, Memlekettik syilyqtyń jáne halyqaralyq «Alash» ádebi syilyǵynyń laýreaty, «Qurmet» ordeniniń iegeri Esenǵali Raýshanovtyń «Erkem, Jaiyq...» atty shyǵarmashylyq keshi ótti, dep habarlaidy «QazAqparat» tilshisi.
Biyl alpys jasqa tolǵan aqyndy mereitoiymen oblys ákimi Altai Kólginov quttyqtap, Elbasynyń «Rýhani jańǵyrý» baǵdarlamasy aiasynda atalmysh keshtiń uiymdastyrylǵanyn jetkizdi. «Aq Jaiyq óńiriniń ereksheligin barsha qazaq eli jaqsy biledi. Kúi atasy Qurmanǵazy men Dina, alty alashqa án ozdyrǵan Muhit, onyń ber jaǵynda Juban, Qadyr syndy qazaq ádebietiniń qabyrǵaly ókilderiniń qatary siregen emes. Osyndai bai óńirge arnaiy kelgen Esenǵali Raýshanovtyń da qazaq poeziiasyndaǵy orny erekshe. «Rýhani jańǵyrý» baǵdarlamasynyń bir baǵyty óner men mádeniet bolsa, munyń bári bizdiń ósip-órkendeýimizdiń kórinisi deýge bolady. Ekonomika el damýynyń bir qanaty bolsa, rýhaniiat - ekinshi qanaty. Bir-birinsiz damýy múmkin emes», - dedi óńir basshysy.
«Besigin ánmen terbep, joqtaýyn jyrmen aitatyn qazaqtyń sóz óneriniń orny airyqsha. Qaita jańǵyrǵan dáýirde qazaqtyń myqty aqyndarynyń biri, ózgelermen shatastyrýǵa bolmaityn, kópshiliktiń ishinen dara daýsymen tanylǵan erek talant iesi Esenǵali Raýshanov desek, esh artyq emes. Esenǵalidyń jyrlarynan dalanyń botasynan arýanasyna deiingi tabiǵi minezdi tanyp, bilýge bolady. Arýdyń burymyndai ádemi óriletin qazaqtyń qara óleńimen-aq ulttyq rýhty biik kóterip kele jatqan aqyn. Onyń sonaý Jeltoqsan kóterilisi kezinde dúnieni dúr silkindirgen «Qara baýyr qasqaldaq» atty óleńiniń ózi nege turady!? Jas urpaq osyndai rýhty jyrlardy oqyp ósýi kerek», - dedi aqyn, Qazaqstan Jazýshylar odaǵy BQO bólimshesiniń tóraiymy Aqushtap Baqtygereeva.
Keshte sondai-aq jazýshy-baspager, Qazaqstannyń eńbek sińirgen qairatkeri Mereke Qulkenov Esenǵali Raýshanovtyń 10-synypta jazǵan toptama óleńderine kezinde uly aqyndarymyzdyń biri Jumeken Nájimedenovtiń basyn shaiqap, tamsanǵanyn aityp, onyń sózdik qorynyń moldyǵyna qazaq ádebietiniń korifeileri Ábish Kekilbaev pen Fariza Ońǵarsynova tańǵalyp otyratynyn jetkizdi.
«Esenǵali jyrlarynan uly jyraýlardyń ulyq saryny anyq seziledi. Osydan alty júz jyl buryn Qarǵa boily Qaztýǵan jyraýdyń Edil men Jaiyq boiynan barmaǵyn qars-qars shainap, qalai ketkeni eldiń jadynan óshe qoiǵan joq. Shylbyryn súiretip, shynjyryn úzip ketken Qaztýǵannyń, mine, sol jyry araǵa ǵasyrlar salyp, Esenǵalidyń kókmoinaq tulparyn minip, Esenǵali bolyp qaita oraldy», - dedi aqyn, Tólegen Aibergenov atyndaǵy syilyqtyń laýreaty Svetqali Nurjanov.
Shyǵarmashylyq keshte aqynnyń óleńderi oqylyp, sózderine jazylǵan ánder oryndaldy.
«Aqyn el aldyna shyǵyp, óleń oqyǵanda, halyqty úiretemin demeýi kerek. Qaita odan úirenemin deýi kerek. Sondyqtan meni qoldaityn jurtshylyqtyń bárine basymdy iemin», - dedi aqyn, Memlekettik syilyqtyń iegeri Esenǵali Raýshanov.
